Ua mae‘a semina faasolo a le aufaigaluega faifeau i Samoa, Niu Sila, lea ua usuia mai i le setete nei le semina a Ausetalia a o Novema faasolo atu i Amerika. Na tatalaina ma faafeiloai auauna a le Atua ma faletua i le Aso Gafua, aso 11 o Aukuso ae faamae‘aina i le Aso Tofi, aso 22 ma ta‘ape ai i le Aso Faraile.
O se ripoti na faamatuu mai e le Faatonu o le Puletini a le Ekalesia, le susuga ia Setiu Iakopo Togipau, na ia ta‘ua ai o le mataupu na pasia e le komiti aoao e faasolo i atunuu uma lenei semina. O le ‘auga o aute, o le faa‘oaina lea ma toe tapu‘e ai finagalo o le aufaigaluega faifeau e le gata o le folafolaina o le finagalo o le Atua ae o le faatāuaina o o latou tiute tauave i le va ma ekalesia.
Sa faamamafa e le Taitai ia Pr Uili Papu i lana saunoaga manimo ma le toto‘a e faapea, o faifeau o i latou o auauna tausimea a le Atua ma folafola Lona finagalo, ae aua ne‘i iai se agaga e pulea ai e ia se ekalesia, ia iloa foi le va feavatai o toeaiina ma faifeau.
Sa talanoaina ai foi le sauni atu mo le fonotaga lea e usuia i Samoa i le masina o Fepuari aemaise le alo atu i le faaulufaleina o le ‘Ala o le Atua i le nofoaga autu o le lotu i Apia lea na mu i le afi. O le laulauafono sa auai mai e aofia ai le Taitai aoao o le Ekalesia Aso Fitu Samoa Tutoatasi (S.I.S.D.A.C), le susuga ia Pr Uili Papu, Failautusi, Pr Iafeta Masepa‘u ma le Teuoloa le susuga ia Pr Auseugalelei Liutana Vaotuua. Na logo mālie sao tāua o auauna i le fefaasoaa‘i i Afioga Paia a le Atua aemaise foi le susuga ia Pr Paulo Pelenato o se tasi o faifeau sinia i le ekalesia tele SDA lea ua siitia mai ma le aiga ma galulue i le SISDAC.
Na faamae‘aina le Semina i le Aso Tofi ma taualuga ai i se taumafataga na tapenaina e le Uncle Sam’s Take Away a Poulava Sam ma Lorna Mata‘utia ma amata ta‘ape ai le filialii, toe taliu le aufaigaluega i nuu ma alalafaga.
