Ua faagasolo i le vaiaso lenei aoaoga auā le faatautaiga o faigapalota i le Pasefika. O se aoaoga ua talafeauga lelei le faatinoga ma le feagai ai o atumotu eseese o le Pasefika ma faigapalota i lenei vaitau o le tausaga e oo lava i le tausaga fou.
O Samoa o lana faigapalota tele lea e faia i le tausaga e 2016 ae ua iai nisi o galuega a le Ofisa o Faigapalota a le atunuu ua amata faagasolo e pei o le lesitalaina o i latou e aofia i totonu o lola palota.
Ua iai suiga e pei ona vaevaeina ai nei itumalo tetele ia e tailua sui faipule ina ia mautinoa e tasi lava le sui faipule i lea itumalo ma lea itumalo.
Ua pasia e le Palemene le faaopoopo o le 10% poo nofoa e lima o tamaitai i totonu o le maota fono i le isi faigapalota lea o loo loma nei. O loo faapea foi ona faagasolo suiga ina ia aveese ai loa nofoa o faigapalota taitoatasi ae toe foi i palota Samoa le faatautaiga o lea faiga filifiliga.
O suiga ia ua matauina o le a agai i ai Samoa i le faigapalota tele i le lua tausaga o loma nei, peitai e eseese lava suiga ma le faatautaiga o palota ma o le feau tāua lena o le fonotaga faaleaoaoga lea e faatautaia e le ofisa o Faigapalota a Samoa i le fesoasoani ma le lagolago a le malo o Ausetalia e ala i le faalapotopotoga o le PIANZEA e vaavaai i galuega ma le faatautaiga o palota i totonu o le Pasefika e aofia ai Niu Sila ma Ausetalia.
Faaalia e le Afioga Fiame Naomi Mataafa, le Minisita o le Matagaluega o Faamasinoga ma le vaega lenei o faigapalota, e eseese lava atumotu ma le faatinoga o a latou palota ae e pei o le aogā lenei ua valaaulia ai fai palota o atumotu eseese o le Pasefika, ina ia saga unai le malamalama o tagata palota ma tagata fai palota i auala manino ma le faamaoni e faatino ai le filifiliga o tagata e tulai mo i latou i le Palemene ae le gata i lea o tagata o loo aoina ma faitau palota i le aso o faigapalota tetele a le atunuu.
Faaalia le agaga faafetai o le Hai Komesina o Ausetalia i Samoa o Sue Langford i le maualuga o le faamamafa ua faasoa faatasi ai Samoa ma isi atumotu o le Pasefika, ma na ia faaalia o se vaega lenei e ave lava i ai le faatāua a lona foi malo i le mautinoa e agai atumotu o lenei itulagi i faigapalota manino ma ia unai pea pulega faatemokarasi e pei ona vaaia i lenei atunuu.
O atunuu o loo iai o latou sui i lenei aoaoga e aofia ai Papua Niu Kini, le Atu Malesala, Timor-Leste, Vanuatu, Niue, Atu Kuki, Kiripati, Tuvalu, Tokelau ma Samoa.
