E pei ole siva ale tupu o Tavita ina ua momoli le atolaau ale Atua i Ierusalema le saasaa fiafia ale faafeagaiga ia Victor Pouesi, ile fuataimiina ole pese fatu sa usuina ile sauniga. Ole agaga faafetai ile Atua ona ua mae‘a le fausiaina o lona malumalu tapuai.
O upu ole pese e faapea, “Le malumalu na e fausia mai totonu o lo matou faatuatua itiiti e pei ole fua ole sinapi”.
Na oo foi ile mamalu ole au valaaulia na auai e molimauina lenei faamoemoe, sa le mafai ona taofia lo latou fia patipati, e faailoa lo latou fiafia faatasi ma le faafeagaiga ile taimi ole sauniga. Ose tu ma se aga e le masani ai le talitonuga faa-EFKS i ana tapuaiga.
Ta‘ua ele taitai ole sauniga susuga ile Toeaina ia Tanielu Mamea ile taimi ole ‘ava ole feiloaiga, ole siva ale faafeagaiga o Victor ole siva faaleagaga e pei ole tupu o Tavita. O ai se a lē fiafia pe afai ua mae‘a ona fausia le galuega e auauna ai i lona Atua.
Ole Ekalesia EFKS Puaseisei, ua lauiloa ile faatautaia ole polokalame 13 Aso ole Kerisimasi i Aukilani Niu Sila i tausaga taitasi. Ole Aso Toonai la na se‘i mavae atu nei, 17 o Iuni 2017 na viia ai ma faafetaia ai galuega na fitaituga iai le Ekalesia, ele Taitaifono ole Ekalesia Faapotopotoga Kerisiano i Samoa, susuga Tunumoso Iosia. Ma tuuina atu ma le meaalofa tupe mai le Ekalesia aoao i Samoa e $20 afe tala Niu Sila.
Ole lauga autu ole aso na faamamafa ile fuaitau e faapea, “Ole Fale tapuai ile Atua” e na‘o sauniga foi e fai ile Atua e faatinoina ai.
E tusa ma le lipoti ale Teutupe ile tala ole galuega, e tusa ma le 3.6 miliona tala le tupe atoa na fausiaina ai le malumalu faatasi ai ma tau o auaunaga sa faaaogā ile galuega.
Ole tasi o tupe tele na alu ile faatauina ole fanua oloo tu ai le malumalu tapuai e tusa ma le $800 afe tala.
E le ose galuega faigofie lona faatinoga e tusa ai ma le saunoaga ale tamaitai tusiata fale Daine Greenwood ina ua tapa sona finagalo ile ata ole fale. “Ole itu faigata ole tusiaina ole ata ole fale, ole faavae, ona ole tulaga oloo fausia ai le fale e vaivai le palapala ma e tele se taimi e fetuunai ai le ata ina ia pasia se faavae mautu.
E le gata i lea, ole tusiina lea ole ata ole fale Samoa oloo fai ma itu pito i luma ole falesa (foyer). Na ia ta‘ua e le mafai ona faaaogā pou laupapa e tusa ma fale Samoa, ona e vaivai le palapala e manaomia le fausiaina o pou sima e pei ona faaaogāina ile taimi nei.
Ta‘ua ele faatonu ole konakarate kamuta Trinity Henry Rogo, “Ole fale Samoa le vaega faigata ole fausiaina ole maota tapuai, ona ole tele o laupapa, e tatipi ma lolo‘u ia maua foliga ole fale Samoa, ose vaega lea na umi se taimi o galulue ai, peitai o lea ua tino mai ise tulaga matagofie.”
Ta‘ua ele susuga faafeagaiga ia Victor Pouesi, “E lei iai se tupe amata ole galuega ile tausaga e 2005, ae na ou fia iloa poo fea o iai le finagalo ole Ekalesia ile galuega, ina ua fesiligia le ekalesia pe fai se galuega, na sii uma i luga aoao ole Ekalesia.”
“Ile sii a‘e o lima ole Ekalesia na ou faapea atu ai e lua vaega nei ua outou siilima iai, muamua ole faiga ole galuega, ma le lona lua, poo le ā le tulaga e oo iai le tau ole galuega, tatou te galulue lava e totogi ole tatou taulaga lea ile Atua.”
E oo mai ile tausaga 2015 ua $800 afe tala le teugatupe ale Ekalesia mai i latou lava sailiiliga, ole tupe faavae foi lea ole galuega e pei ona ta‘ua ele susuga ile Faafeagaiga. Ile taimi nei, e 48 matafale o tiakono ma aoao, ae silia ile 20 matafale asiasi poo matafale lolotu.
E 1.2 miliona tala le aitalafu ole galuega, ose itu ua manino iai le Ekalesia, ona ole latou tautoga lea ile Atua e fai ma taulaga, o lea lava le tau ole galuega ole a togi maa iai ma togitogi mo se taimi umi e fua lava ia latou sailiga tupe. E le o iai se finagalo ile faafeagaiga ia Pouesi e toe fai ni saogatupe a matafale ae ole a galulue faatasi le tino ole Ekalesia e togitogi e ala ia latou suegatupe.
“Ole viiga e foi ile Atua ona ua mae‘a le galuega, oute faafetaia foi le Eklesia ona ole latou tutu malosi e lagolago le galuega ile 11 masina ua mavae, faatasi ai ma la‘u faafetai isi o‘u toalua ma si a‘u fanau, tele se taimi na lē maua ai se mafutaga lelei ma si o‘u aiga ona ole galuega, ae faafetai o lea ua mae‘a le fale ole Atua. Ia toe faafoi lava le faafetai ma le viiga ile Atua o Lē ona le mānava ma le malosi,” ole saunoaga lea ale Susuga Victor Pouesi le faafeagaiga taulagi ole Ekalesia EFKS Puaseisei Magele i Sasa‘e.
