Ua taunuu le faamoemoe. Ua manumalo Tony Finau i lana taamilosaga muamua faapolofesa. O le taaloga o tagapolo lea a le PGA sa faia i Puerto Rico i le vaiaso ua tea nei.
O le alii lenei o Finau, o lona tamā o le Toga, ae o le tina o le tamaitai mai Amerika Samoa. Na fanau o ia i Utah i Amerika i le tausaga 1989. Ua 26 tausaga o lona soifua. Ma ua tele foi tausaga o foufou mai lana taalo faapolofesa.
O le manumalo a Finau e lei faigofie. I le faaiuga o le taamilosaga i le taimi masani, i le iu ai o aso e tolu, o loo tutusa ona ‘ai ma Steve Marino. Sosoo ai ma le toalua o Ian Poulter mai Amerika, ma Rodolfo Cazaubon o Mexico. O Finau ma Marino na tutusa ‘ai i le 12 i lalo.
I le masani o le Tapolo, pe a tutusa ‘ai i le faaiuga o le taimi, e tauva lava seia oo ina ia maua se manumalo. Na faapea la ona fai – toe foi o Marino ma Finau i le malae.
I le fu‘a muamua o le toe ta o le toalua lea, Marino ma Finau, na tutusa. O le fu‘a lona lua na tutusa foi.
A o le fu‘a lona tolu la, na maua ai e Marino le avanoa e manumalo ai, peitai, na leaga le isi ana ta, maua ai loa ma le avanoa a Finau. E lei faamaimauina le avanoa a le alii mai Utah, ma manumalo ai loa i lana taaloga faapolofesa muamua.
Na ta‘ua e Finau i lana talanoa ma le au faasalalau ina ua manumalo, na ia faapea ai o loo to‘a lava ona lagona. O le manumalo muamua o se mea na moemiti i ai, ae o lea la ua ia umia le Ipu o le manumalo.
E ui o se manumalo muamua lenei a le alii talavou, peitai ua leva ona foufou mai lona lelei. O le tausaga 2015 ua tea nei, na maua ai e ia le faailoga mai le PGA o le tagata fou o le tausaga. O lea la ua faaali ana fiaga mo le manumalo, ma faatino ai le faatuatuaga a le Asosi Tapolo a le vaega faa-Polofesa, o ia lava o se tagata e matuā lelei lava le Tapolo.
O ia o le alii Toga ma le Samoa ua uumauina le Ipu o le Tagapolo Faapolofesa. O ia foi o se tagata Samoa muamua ua uuina le avanoa e taalo ai i le lio o le vaega o Tagapolo Faapolofesa.
E $540,000 Amerika le seleni na manumalo a Finau. E ui na maua ana seleni muamua i taaloga a le PGA, peitai o le taimi muamua lenei ua tu ai o ia i le tumutumu o le mauga ua na o ia.
Na viiviia foi e le aufaasalalu le taleni a Finau. Ta‘ua e Jason Sobel o le ESPN, o Finau ua maua lana malo muamua, ae o le a lē gata ai iina. E matuā maoae le taleni o loo umia e Finau, o le tusitusiga lea a Sobel ina ua uma le taaloga.
E toatele foi mai le lio o Polofesa na faamalo ia Finau. Ma le fiafia, ona o le maua lea o lana manumalo muamua.
“Na ou taumafai lava e faatāua le taimi. Ou te lei vaai mamao atu i luma, ae sa ou vaavaai, o le galuega lava ma lona taimi. Ou te lei popole foi i tulaga o le taaloga, ae na ou tausinio lava i le taimi ma lona aogā,” o le saunoaga lea a Finau.
