E lei faalilo pe natia le matuā fiafia o Julian Savea i le filifilia faatasi o ia ma lona uso laitiiti o Ardie Savea i taaloga amata a le Olopeleki ma Uelese. O taaloga ia o le Steinlager Series ma le ‘au malosi a Uelese.
O se mea sa moemiti i ai o ia i tausaga ua tea i se avanoa e taaalo faatasi ai o ia ma Ardie i le aufili a Niu Sila.
O Ardie ua 22 ona tausaga, o ia o se tasi o tama fou o le toaono o tama fou lea na filifilia i le Olopeleki. E iai Ofa Tu‘ungafasi, Elliot Dixon, Liam Squire, Damian McKenzie ma Tom Franklin.
E ui la ua maua lenei avanoa manaia mo laua ma Ardie e taaalo faatasi ai, ae o loo iai foi luitau mo ia (Julian).
E ala lea i le finau e faamautu o la tulaga i le ‘au. I le taimi nei o loo avea o ia ma uigi numera tasi a le All Blacks, ae faamata e toe maua e ia lea tulaga? O le fesili tele lea o loo iai i le taimi nei.
O le All Blacks foi ua iai suiga i le laina i tua ina ua malolo nisi o tama tuai o le ‘au e pei Maa Nonu, Conrad Smith ma Daniel Carter. Na ta‘ua e Julian o le a faamasani foi lana taalo ma nisi o le a tofia i le numera 12 ma le numera 13.
I le taimi muamua sa masani lelei lana taalo ia Maa Nonu ma Conrad Smith, lea sa taaalo i le 12 ma le 13 a le All Blacks.
Na ta‘ua e Savea le lē fiafia o ia i tala faaseā a le au tusitala ia te ia i le amataga o le tausaga. Aemaise le fesiligia pe o lelei pea o ia mo le All Blacks pe leai. Fai mai Savea e lē o se mea lelei ia tala mo ia ma lona aiga, peitai o le a lē popole o ia i ia tala, auā o lea ua taunuu le taimi o taaloga taua a le All Blacks.
O loo faatalitali foi mo le avanoa e taalo ai i le laina i tua faatasi ma Malakai Fiketoa ma Ryan Crotty.
I le feiloaiga ma Ardie na ta‘ua ai lona fiafia tele mo le avanoa ua tuu atu ia te ia. Na iai lona popolega pe maua sona avanoa i le All Blacks auā na tauva ma Matt Todd o Canterbury i le tulaga lea.
Peitai o le lelei o lana taalo i le vaiaso lea na tea nei, lea na maua ai ana sikoa e lua. E talitonu Ardie o le taaloga lea na matala ai le avanoa mo ia i le All Blacks. O le a taumafai foi o ia e uumau lenei avanoa ua ia maua.
A o le mitamitaga, e pei lava o lona uso matua, o le la taaalo faatasi lea i le All Blacks. I talafaasolopito a le aufili a Niu Sila, o le 44 ai lea o auuso ua filifilia mo le All Blacks. Ae a taalo faatasi i laua i se taaloga a le au, o le a toaiva ia laua ni auso ua taaalo faatasi i se taaloga a le All Blacks i se taimi e tasi.
E toaono alii Samoa ua faamanuiaina i le Olopeleki i taaloga amata o le tausaga. O isi alo o le atunuu ua ofi i totonu o le ‘au, e iai Charlie Faumuina, Jerome Kaino, Patrick Tuipulotu ma Lima Sopoaga.
I talanoaga ma le Samoa Times, na ta‘ua ai e Kaino e lē o se mea fua ia te ia le toe maua e ia o lenei avanoa. E ui ua sefulu ona tausaga i le ‘au peitai e pei lava ua faatoa filifilia o ia. Faapea foi Faumuina, e ui e lei atoatoa le uaua na faaletonu ai lona tuaua i le tausaga na tea nei, peitai ua solosolo lelei lana faalogo.
O le luitau mo i latou uma nei, o le laasia lea o le filifilia o i latou i le ‘au amata o le taaloga. O se avanoa e tuuina atu, o le a lē faamaamulu lea i ai.
Ae o le a tauia le faamoemoeina o i latou e le alii faiaoga ma le Olopeleki i le taalo malosi ma le finau lelei e tuu pea le All Blacks i lona tulaga numera tasi i le lalolagi.
