“Alu se isi e aumai le ta‘ui ‘afa se‘i fafau le salu. Tamoe si o‘u atalii e toli mai niu ‘afa se‘i sasa ai ni matofi e toe fili ai se isi ‘afa”. O le gagana lea sa faalogoina pea i tausaga ua mavae a o fulisia nuu ma afioaga o le atunuu i fale Samoa atolau.
O le ‘afa e fafau ai, o le ‘afa e su‘i ai lau, o le ‘afa foi e faamaumau ai lau. E soo se mea lava o le ‘afa e faaaogā i ai. O aita o le tainamu o le loomatua ma le toeaina o le ‘afa lava e tatau ai, o le ie o le toeaina pe a leai se fusipa‘u o le ‘afa e nonoa ai.
O le agaese faigaluega e toe fafau i le ‘afa lona ‘au ina ia mau lelei le ‘au laupapa a le palagi ae sili foi ona mau lelei ai le uuina o le agaese poo le sapelu. O lea se toe silasila a le atunuu i nei aso ina ua aumai fao a papalagi ma aumai ituaiga o manoa eseese. Ua sili foi ona tele suiga ina ua leai ni fale afolau ma ua lē toe vaaia ai i le lautele o le atunuu o galueaina le gaosiga o le ‘afa.
O le autu lea o le fesoasoani a le Malo Amerika ua toe fafagu mai ai le gaosiga o le ‘afa ma ua tuu nei i le fale mata‘aga e fai ma pine faamau o lea oloa tāua a o se vaega tāua foi o a tatou tu ma aganuu, ina ia fai ma vaaiga mo fanau ma tupulaga o le lumanai.
O le afioga Galumalemana Steve Percival o se alii faia ata poo se film maker na ave i ai le seleni mai le fesoasoani a Amerika na te aoaoina ai ma tuufaatasia faamatalaga ma ata o le gaosiaga o lenei oloa.
O le molimau a Galumalemana o ia e leai sona silafia i le faiga o lea galuega, peitai ina ua agai i nuu ma afioaga ma sui o le Matagaluega o Aoga, Taaloga ma Aganuu, e tuufaatasia le poloketi, na maofa i le molimau ane a le toatele, ua mou atu lava le gaosiga o le ‘afa a Samoa.
O le galuega lenei sa fiafia tele i ai le au matutua poo matai tino i matutua o se nuu e latou faatino i le taimi o loo fai le fono a le nuu. “E alu lava le fono ae alu foi aao o le matai i le faataa o ana matofi ma fili le ‘afa ma e uma ane lava le fono ua toeitiiti uma poo le mae‘a lava o matofi e lei uma le fono”. O le molimau lea a nisi o tamā matutua na faatalanoa e Galumalemana i le ata tifaga sa ia tapenaina.
Faaalia e le Ofisa Sili o le Matagaluega o Aoga, Taaloga ma Aganuu, le afioga Matafeo Falanaipupu Tanielu Aiafi, o se tasi lea o vaega tāua i galuega faatino a le matagaluega o le toe faamaopoopo mai o nei galuega poo measina a le atunuu.
O le agaga faafetai lea a le Malo ma le matagaluega i le Malo o Amerika ona ua avanoa se isi fesoasoani e faatino ai lea poloketi. E lē gata ina saunia le ata tifaga i le gaosiga o le ‘afa ae o ata pue ma vaega uma e iloa ai le faaaogāina o le ‘afa i tu ma aganuu faasamoa ua faatupeina i le fesoasoani.
O loo faalauiloa uma nei vaega i le fale mataaga i Malifa i le lotoā o le ofisa o aoga a le Malo.
