O se fonotele matagofie lenei a FAGASA na faatumulia ai le maota i Ascot Park Hotel i Inivekako i le vaiaso na tea nei, mai le Aso Lua 7 -9 o Aperila. Ua lē gata i faiaoga, ma tagata o le vaiaai ae ua faapea foi i le tupulaga talavou amata mai lava i Aoga Amata e oo i le fanau o loo i kolisi, ma i latou i iunivesete ma ē ua faigaluega.
Na usu faaaloalo le mamalu o le lala i Inivekako i le ‘ava o le feiloaiga i le uluai aso, ina ua mae‘a le sauniga lotu na taitaia e le susuga i le Tausi Matagaluega, RevTaoa Lavea, sosoo ai ma le saunoaga faafeiloai a le Peresetene Aoao o le FAGASA ona tatala aloaia loa lea o le fono mamalu e le afioga i le Komesina Sili o Samoa, Afioga Leasi Papaalii Scanlan.
O le saunoaga aami poo le ‘Ati Tutasi o le fonotaga na feagai lea ma le afioga i le Sea Rev. Masunu Utumapu mai le Matagaluega a Aukilani i Saute o le ekalesia Metotisi. O se saunoaga na logoleleia ma tapena lelei i ona itu uma. E lei uma le fia faalogo pea i ai o le auusufono.
E tele tausaga o lona soifuaga i le tofi faiaoga ma puleaoga ai i Samoa i aoga a le Metotisi, aemaise foi o loo ua faatu lava la latou Aoga Amata i Aukilani mo la latou ekalesia. Na ia molimauina le toatele o tamaiti, ma o loo ua iai foi ma tamaiti faatalitali i la latou lisi mo le fia ulufale atu i la latou Aoga Amata.
O le aso na sosoo ai na taitaia ai le sauniga lotu e le susuga e le Misionare ia Lole, ona sosoo lea ma le amataga o faasoa i le pepa na faasoa i ai le susuga ia Papaalii Dr. Semisi Ma‘ia‘i, “O le puipuia o le gagana Samoa” (In defence of Samoan language). Sa tele ni fesili lelei na maua mai tali ma faalototeleina le aofia ia toe faaaogā faailoga o le faitautusi mai lea folasaga.
E toaiva le ‘aufaasoa na feagai ma le tele o mataupu eseese e faatatau lava i le manulauti o le fono: “Tautua faamaoni nei, mo se taeao manuia”.
Faatili Esera: “O le toaga mau amuli, o le toaga tagata”.
Aliimuamua Nofo Lalau: “Tapena faafafine toaga & faaiuga o suega o le NCEA i Ueligitone”.
Saili Tavita: “O le Anofale – auupega mo le suega o le faitautusi a tamaiti”.
Diane Tuaopepe, Saili Tavita ma Sapi mai le aoga a Sutton Park: “Fai ma lou iloa – O le feagai ai ma le aoaoina o gagana e lua (bilingual education)”.
Leautuli‘ilagi Taotua Sauvao: “O le pale manogi matagofie, e su‘i i fualaau manogi eseese: (A beautiful scented garland is made from mixed scented flowers)”.
Na faamamafaina i lenei faasoa le mataupu o le Saienisi (Science) ma faatusatusa faiaoga, o se pale manogi pe a tautua faamaoni i le tapenaga o metotia eseese e faafiafia ai le fanau auā so latou lumanai lelei i aoaoga o feagai ai. O le auga lava o le gagana ma ituaiga metotia felanulanuai mo le aoaoina o le Saienisi ma faaaogāina ai le gagana Samoa.
Afamasaga Pavihi: “O le sauaina o aiga (Family violence)”
Na faia le saolaupulega o finagalo e le panel sa feagai lea ma i latou na tofia faapea le afioga i le Faatamā o le FAGASA, le afioga ia Leasi Papaalii Scanlan i le aso faaiu o le polokalame, ma sa manaia fesili ma tali na faasoaina i soo se mataupu i lea aso.
O faaaloaloga matagofie mo le Komesina Sili o Samoa faapea le aumautofi o le FAGASA Aoao na feagai lea ma le lala malosi i Inivekako i le toe aso o le fonotaga. O se tala fiafia na maua e le lala i Inivekako le Ipu o le lala e pito sili a latou sui lesitala i le tausaga nei. Sa foaia e le afioga i le Faatamā o le FAGASA ia Leasi Papaalii Scanlan i le Peresetene o Inivekako, Maualaivao Eti Fata.
Sa faatautaia le polokalame atoa o le fono e le Tofa ia Masaga Matua Kuresa i le galulue faatasi ma le Peresetene o le lala i Inivekako le afioga ia Maualaivao Eti Fata.
Faafetai:
Avea lenei avanoa e momoli atu ai le faamalo ma le faafetai tele i le lala malosi i Inivekako. Aemaise le susuga i le Tausi Matagaluega Rev Taoa Lavea ma le faletua faapea le ekalesia i le Auso fealofani ma le Aoga Aso Sa i le faa‘ula ma faafiafiga matagofie na saunia e faafiafia ai le po fiafia o le fonotele, aemaise o le tausiga o le ‘auusufono i taumafataga felanulanuai matagofie.
E talitonu e lē o tuufua le lagi ma fofoga alofa o le Atua e na te toe faamanuia atu ma faatutumu mea ua toesea ona o lenei faalapotopotoga. Faamanuia tele atu i o outou tofi ma matafaioi ua galulue ai, e tautua lo tatou Atua. O le upu moni ua ta‘ape le fuamanusina, ua tofu ma le i‘a mai faasoaga uma aemaise ai la outou faaaloalo ua nanea ai le faamoemoe. Faafetai faafetai tele.
