Ua taunuu nei i laufanua o Kuiniselani nei le faigamalaga mamalu a le afioaga o Satufia Satupaitea mai Salafai ona o le galuega a le Atua poo le Matagaluega Metotisi. O le tatala aloaia o le DVD o talatuu ma le siosiomaga o laufanua o Satupaitea faatasi ai ma viiviiga o ona laufanua.
O le a lē toe vivitamai i le atumaniu pe tuumasoa upu o Samoa i le afua mai i le faana‘elupe o le laoso seia paia ma faaifo le taulaumea o le lagoto, auā o paia o Samoa e tumau e oo i le faavavau.
Auā o lele ua lago tonu le faga i lona alai‘asa, ua faatauau foi i‘a o le faaga e pei o le faiva o le matua fia i le Alataua. Auā sa molitai i lagi o manū se faatagiua auā faiva sii o le tausi matagaluega ia Rev Su‘a ma le faletua ia Filionosa Moananu, o ni lupe faalele mai Asau ma Palauli ma le Matagaluega Metotisi Satufia Satupaitea.
E ui ina lalaga peau vale ma gausia toovao o le vaouli, a o alofaiva le susuga i le tausi matagaluega Metotosi auā le galuega sa feagai ai e ala i le pueina o le DVD, peitai o lele ua atoa tino o le tama sa faamoe i le ana. Ina ua talimatu le mafutaga a alo ma fanau o Satufia, faapea soo se toto o Satufia.
E avea ai lenei taimi e valaau faaaloalo atu ai i alo ma tamafanau faapea ni o matou paolo ma ni o matou gafa e malu ai lenei nuu i itu e fia o Samoa, e susū mai afio mai tou te maimoaina ma tatou limalima faatasi auā le faamoemoe, i le tatala aloaiaina o le DVD a lou nuu o Satupaitea.
E lē mafai foi ona galo si ou soo tulutulu ia Palauli ae faapea foi Palauli Falefa. Ua lē ma lava le mativa. O lou agalelei ma lau foai ma lou aao mafola matou te tali lima mafola. A o sisila fofoga o le lagi to mai manu faaua e maligi ala o faamanuiaga mai le lagi.
Aso o le faamoemoe, aso 23 o Me 2015 i Kuiniselani nei, ma e faamoemoe o le 10 i le taeao e tusi ai lou aao foai, sosoo ai ma le Sauniga lotu puupuu, ona alo ai lea i faiga tausala, seia paia le lua tolusefulu (2:30pm) alo i le taumafataga ma faaauau ai le polokalane seia mae‘a, ma le auga o le faamoemoe o lau DVD.
O le Isaraelu moni lava ia na te iloa lona faasinomaga, o le tagata foi ma lona nuu, ae sili ai ona auau le tava‘e i ona fulu.
