Ua leai ni tuuga fautasi o le tutoatasi o lenei tausaga ae sa folafola mai o le a faatoa faataunuu i le vaiaso o le Teuila o le 2018. Peitai o lea ua manino nei ina ua fesiligia le minisita o tagata tafafao mai fafo le afioga Sala Fata Pinati, ua lē taunuu. “Ai seiloga ua oo i se selau afe tala le tupe e fai ai faailoga ona toe fia auai lea ni Sa o nuu ma afioaga”.
O le finagalo o le Minisita e fua i le lagona musua ua molimauina i le leai o ni nuu ua oo atu i le komiti o tapenaga ni manao e lesitala o latou fautasi, ona e foliga mai o faailoga tupe sa maua i tuuga fautasi ua mavae i le taimi o le Teuila, ua le fetaui ma le tautiga o kapeteni ma auvaa pe a fua atu i seleni e faaalu i le tausiga o le auvaa ma isi fuafuaga a’o lei faia se tuuga.
“Ou te iloa o le isi lena mafuaaga o le faatutu gata o lagona o nuu e toe faaulu se fautasi”. O le molimau a nisi o kapeteni i tuuga fautasi ua mavae e le gata o le tutoatasi ao le Teuila e oo ifo ina tufa nai seleni mo le auvaa e laki ae maua se selau tala a le tagata e toatasi, auā e muamua tufatufa i le tapuaiga a le nuu i tulatoa ma faasa’osa’o aemaise o matai fai upu, ae le taulia le faamuamua o le tufa i Ao faalupega sa moli talosaga ao tapena le faamoemoe, e uma ane ua tau faasoa se seleni ua totoe mo le kapeteni ma le auvaa.
Na faailoa foi e le Minisita o le Teuila o le tausaga nei, o le a leai ni polokalame e faia i luma o le maota o le Malo, ona o le galuega o le toe faamatagofieina o le taulaga. “ O le Malo o Niusila lea ua amatamea i le atinae o le toe faaaulelei o le tatou taulaga ma o luma maota e amata atu ai le latou galuega seia oo i le uati tele i le taulaga”. O le a faaaogā le malae i Sogi o loo lumafale iai nisi o pisinisi ma faletalimalo e faia ai le sauniga e tatala ai le Teuila o le 2018, ma o le a faaaogā ai foi ma le maota o Tupulaga o le EFKS i Sogi e faia ai nisi o tauvaga. O se vaega o le eleele fou o loo tuafale iai le maota Samoa o le pulega o tagata tafafao mai fafo o le a faia ai isi polokalame.
O le taualuga o le Teuila o le tauvaga e saili ai se Tausala o Samoa o le a faia i Savaii, ma o le taimi muamua lea i le tala faasolopito o le Teuila ma le tauvaga o le sailia o se lalelei o Samoa o le a talimalo ai Puleono i Salafai.
