Ua lē nofoai Samoa i fafo i le vaai atu ma le agaga alofa i le mafatia ua feagai nei ma i latou sa faamoemoe le tausiga o aiga, tautuaina o Ekalesia ma meafai i nuu ma afioaga i tupe maua sa maua mai i mea faatau i le Maketi i Savalalo. Faaalia e Matamua Lapa Leatioo, o se tasi o le komiti ua faamaopopoina nei se fesoasoani, “O se taimi faigata tele lenei mo nai tagata sa fai a latou poloka i le maketi pe faafefea ona toe amata ona ua liu lefuefu mea uma.”
O le Savalalo Market – Support Fund Appeal ua tuufa’atasia nei e nisi o tamalii Samoa sa faapea ona taulamua i le fesoasoani Tsunami Samoa 2009 (TS09) lea foi sa iloga lo latou sao i le puapuaga sa feagai ma Samoa i le 2009. Faaalia e Sooalo Setu Mua, “O lea ua tapenaina le bank account mo le tuuina i ai o foai a tagata e fia fesoasoani mo le toe tau amataina o atinae sa iai i le Maketi i Savalalo. Ua amata foi fesootaiga i Samoa ma ofisa o loo vaaia le maketi mo le mauaina mai o le lisi o i latou sa iai faleoloa ma faleaiga.”
O le faamoemoe, ia tuusa‘o atu se fesoasoani ia i latou faipoloka ua aafia. O le ā se seleni o le a maua o le a tufatufaina atu lea o se fesoasoani tautupe e toe tau amata ai nai a latou atinae.
Faaalia e Pa‘u Fereti Puni o le komiti, “O se taimi faigata tele lenei mo le toatele o nai aiga sa iai mea faatau ona sa faamoemoe i ai pili o fanau i le toe amatalia o aoga o lenei tausaga. A mafai ona o tatou fesoasoani i se tupe e toe faatau ai se ogaumu poo se ta‘aiga i‘e e toe amata ai nai atinae, o lo tatou sao tāua lena.”
O le upu a le atunuu, “O uo mo aso uma, ae o le uso mo uso leaga.” Mo nisi faamatalaga faafesootai mai Matamua Lapa Leatioo (027) 298-1020 poo Sooalo Setu Mua (021) 0232-1489.
Faamatalaga na tuuina mai
