Ose tina ua lauiloa lona suafa ile toatele o tagata Samoa i Niu Sila aemaise lava i Aukilani, ona e ese mai nisi ona tiute ma tomai sa muai galue ai, ae o lana tautua latalata mai nei, ile gaseseina o taumafa eseese mo faamoemoe tetele, i lana pisinisi le Continental Catering, lea sa iloga ai lava le suafa o Lena Brunt, poo le faletua ia Lena May Brunt Betham.
Ae pagā lea, ole po ole Aso Faraile, 14 o Oketopa ile 11.10 ile afiafi na to ai le mānava ma faaiuina ele Atua tiute ma galuega ale faletua ia Lena May Brunt Betham mai lenei lalolagi ile maota o tagata matutua i Papatoetoe. E tele ni gasegase sa aafia ai lenei tina mai le tele o tausaga, ae peitai o lona fatu lea faapea na mafua ai ona maliu.
Ole valaau ale Atua ile tina, ose malaga ua alu ma le loto fiafia ina ua uma ona ia tapena ma fuafuaina mea uma o lona maliu ae lei tuua le latou mafutaga ma le fanau ma ona aiga. Sa faigata ona talia ele fanau le matuitui ma le tiga ua oo mai, auā ose tina sa finau ma le tele o ma‘i ole tino ile tele o tausaga ae sa finau malosi foi e faaauau lana tautua mo lona atunuu ma lona aiga.
Na maliu le faletua ia Lena May Brunt Betham ile po lea ole Aso Faraile, ona molimoli atu lea o lona tino maliu e taoto ai ile maota faasausau o Ligaliga mo aso e tolu, ma toe aumai ai i tua ile Aso Lua ile maota o si ana tama tama o Jack i Manurewa ma taoto ai mo aso e fā. O nei faatinoga uma ose polokalame ua uma ona fuafuaina ele tina ia Lena Brunt isi ana faanau a‘o lei uma lona soifua.
Ole taeao ole Aso Faraile 28 o Oketopa na faia ai loa ona toe sauniga ile malumalu o le Emanuelu Christian Church i Papatoetoe, ma sa faatumulia i aiga, uo ma ē masani sa agai atu e molimauina toe sauniga o lenei tina loto alofa ma le tautua faamaoni.
Ole susuga ile faafeagaiga ia Enele Fua Leaututu na ia taitaiina le sauniga ae ole susuga ia Pastor Tanuvasa Toomata na saunia le tatalo. O galuega lelei a lenei tina a‘o soifua mai, na molimau ai lana fanau, si ona alo tama e toatasi ia Jack ma lona faletua ia Siga ma le fanau, o ona alo tamaitai ia Salome ma Peter ma le fanau, o Leilani ma Pouvi ma le fanau faapea Rosie ma Glen ma le fanau.
E faagalo gata i loto o nei tamaiti le mafutaga ma le tina a‘o molimau ai ile saili malo ole latou tuaa a‘o soifua. Ose tina e finau ma onosai i galuegafai i totonu o lona aiga, e fiafia foi e tautua lotu e ala i lana ekalesia, e osi aiga ma e tumu foi ile loto alofa i soo se tagata.
Ma o nei valevale alofa ole fanau ile aso mulimuli ole mafutaga na vaaia ai loimata o nisi o uo ma ē masani sa auai i ona toe sauniga auā ole toatele o i latou sa auai ile malumalu o nisi ole atunuu sa faamalieina ile tautua a lenei tina e ala lea i lana kamupani mo le gaseseina o taumafa, le Continental Catering.
E tiga lava ona ma‘i Lena e lē taitai faavaivai ise mea e fai i totonu o lona aiga aemaise ai ole faleaiga. O lona loto atoa ma lona naunautaiga ia aua ne‘i faaletonu se mea e tali ai le manao ole atunuu.
Ole susuga ia Dora Tofilau o ia lea sa fai ma sui ole aiga o Betham e molimau i galuega a Lena Brunt i totonu ole latou foi aiga, ae ole faletua ia Kalala Faanene na saunoa e fai ma sui ole aufaigaluega ole faleaiga e molimau ile tautua a Lena ile atunuu.
Ole susuga ile faafeagaia ia Rev Mika Lagavale ole taitai aoao ole ekalesia sa vaganaina le upu faauuina ale Atua e tomatau ma faalototele ai loto ole aiga faanoanoa ona ole mafutaga a mātua ma fanau faapea ma aiga ua momotu ele oti.
Na mae‘a ona toe sauniga ile malumalu ona molimoli atu lea o lona sa ile fanua tanu i Manukau ile nofoaga oloo lagomau ai, ma faaiu ai loa polokalame o lona aso ile hall a Samani Pulepule i Magele.
Ole susuga ia Tala sa fai ma fofoga ole aso e faafetaia le paia ma le mamalu ole aufaigaluega ale Atua e tusa ai ma le latou galuega fita sa faia i toe sauniga ole tina, aemaise ai ole faafetai ile mamalu ole atunuu i uo ma ē masani aemaise o aiga sa faamalo‘ulo‘u atu ona ole fia faamavae atu ia Lena May Brunt Betham.
E maliu le tina ua 63 tausaga le matua o lona soifua. O lona tolua o Jack Euclid Betham ua fai i lagi le folauga. E toafā nai o laua alo, e tasi le tama le alii o Jack Andrew Betham, ma teine e toatolu o Salome La Von Betham, Leilani Janet Toa Mapu ma Rosie Jessica Tahana. E to‘a 11 fanau o lana fanau (grandchildren); o Ceyali Betham, Jack Betham, Euclid Betham, Estella Gilchrist, Jacob Kaiafa, Tailena Kaiafa, Jacqueline Kaiafa, Joshua Kaiafa, Israel Kaiafa, Lena Toa Mapu ma Isabella Toa Mapu.
Se toe tepa puupuu ise vaega amata ole talaaga ole soifuaga ole tina ia Lena Brunt Betham e pei ona sa lomia ai i lomiga e tolu o le Samoa Times (2nd, 9th, 16th, Setema 2014)
Aso Soifua: 24 Me 1953
Afioaga: Leufisa, Faleula
Tamā: Andrew Brunt
Tina: Ramona Fruean
Aoaoga: Aoga Taupou Sa i Savalalo
St Marys
Galuega: Ofisa Retzlaff Ltd (Samoa)
Ofisa Church School Western Samoa
Typist (NZ Industrial Gases)
Chef/Cater
Director
Aiga (uso ma tuagane): Selby (teine), Ray (tama), Yvonne Tinae (teine), Janette (teine), Lorene (teine), Roslyn (teine), James (tama), Gary (tama), April Ash (tama), Luisa (teine), Teuila (teine)
Faaipoipo: Jack Euclid Betham
Fanau: Jack Andrew (tama), Salome (teine), Leilani (teine), Rosie (teine)
Matatia: Onaina pisinisi e lua (business owner)
Filifilia ma sifi Kuka South Pacific Games in Samoa 2007
Filifilia e le televise tasi mo le polokalame kuka
Soifuaga i totonu o lona aiga
Sa fanau ma soifua a‘e Lena i lona aiga i Leufisa i Apia i ona tuaa o Andrew Brunt ma lona tina o Ramona Fruean. O lona tamā o se alii mai Fiti ma Samoa, peitai o le tele lava o lona soifuaga o Samoa lava. E to‘a 12 le fanau e aofia ai ma Lena; e toavalu tamaitai, ae toafā alii, e pei ona ta‘ua o latou suafa i luga. E toalua ua maliliu, o le tuagane matua, ma lona uso, le tamaitai o Selby Brunt.
Aoga/Aoaoga
O lona aiga lava ma ona mātua o le faleaoga ma faioaga muamua ia e pei ona talitonu i ai le toatele. Auā o le ola a‘e i totonu o le aiga, e fai mātua ma faataitaiga a o lei tuuina atu mo aoaoga mo le poto salalau. Sa muai aoga i le aoga maualalo a Taupou Sa i Savalalo, sosoo ane ai ma le aoga maualuga i St Marys. Sa faaiu lava lana aoga i le aoga maulauga a tamaitai a St Marys.
