O se faamatalaga lea a se sui o Samoa o loo galue i le ofisa o Malo Aufaatasi i Samoa ina ua fesiligia le sui o Malo Aufaatasi i lona lala i Apia pe o ā tonu lava manulauti ua ausia e Samoa.
O le faaiuga o le vaiaso na sainilima ai taitai o le Lalolagi, i ona atunuu i totonu o Malo Aufaatasi e faaauau ai Manulauti o le Meleniuma i le mae‘a ai o lenei tausaga.
O ia manulauti sa ta‘ua o le MDGs (Millenium Development Goals) o ni fuafuaga nei na faamalosia le ausia e atunuu uma ina ia aveesea ai le ola mativa ma ia unai ai le tamaoaiga ma le ola lelei o tagata uma o le lalolagi. O nisi o atinae sa i lalo o lea MDGs ua vaaia le ausia e Samoa o le itu lea e tatau ona faamalosia aoaoga i fanau laiti lea ua iai le tulafono e faamalosia ai fanau e ave i le aoga mai i le lima tausaga le matutua seia oo i le 14.
O lea foi ua faasafua atu le aooga fua o fanau e ta‘i 15 i le 17 tausaga o lona uiga ua mafai foi ona aooga uma i lalo o le fesoasoani a le Malo ma ana paaga.
O le siisii o le auaunaga o le soifua maloloina aemaise i tina ma‘itaga ma pepe fou o le isi lea manulauti na tele lava galuega a le Malo na unai i ai le faamautu.
O le unai o avanoa tutusa e pei ona iai le taumafaiga ia siitia le numera o tamaitai i totonu o le Palemene o le isi lea manulauti ua lē mafai ona ausia i lenei tausaga ona o le faigapalota tele a Samoa e faatoa faia i le tausaga fou ae o le faamoemoe la lea o le a faapea ona faaauau i Manulauti Gafataulimaina ia ua faamalosia e taitai o Malo poo le SDGs.
O le sauniga i Apia lava ia sa faia i le aso ananafi, sa faapea ona faamautu ai le taumafai o Samoa ina ia ausia uma ia manulauti i le 2030, o le isi 15 tausaga lea ua faaopoopo atu i ai. O le manulauti lea ua manino lava le telē o le galuega ina ia ausia o le aveese o le ola mativa, ma o le manatu lea o le lala o Malo Aufaatasi i Apia e lei ausia foi e Samoa ona o le manatu e toatele lava tagata e lē o maua faamanuiaga e tatau ona ta‘ua ua atiae soifua ma ua lē maua i le ola mativa.
O le aotelega o atinae ua ta‘ua le mafai e Samoa ona unai e pei o avanoa tutusa o tamaitai ia ua vaaia lava i le tele o taumafaiga e saga unai le itu tau i aoaoga ma avanoa e pulea ai ofisa ma kamupani e tamaitai i le atunuu.
Ua tele galuega a Samoa e taumafai e tali atu ai i suiga ogaoga o le tau e ui ina faigata nei finauga ma atunuu tetele o le lalolagi.
O Samoa foi le isi atunuu ua vaaia le tele o ana taumafaiga i le unaiga o tulafono e taofia ai sauaga ua faia i tamaitai e ui o loo vaaia pea le faatuputupulaia o nei sauaga i totonu o aiga. E lē o manino mai la pe ua mafai ona ausia nei vaega o manulauti e pei ona ta‘ua.
O le aotelega lava o lenei taumafaiga ina ia oo atu i le isi 15 tausaga o lumanai ua mafai e Samoa ona faapea ua tafiesea le ola mativa ma le lē tagolima ma ua oo le atinae o Samoa i se tulaga ua faamalieina ai Malo Aufaatasi i lona atinae.
