Na manaia ma lelei taumafaiga a Alapati Aasa ile la fusuaga ma Junior Fa, e ui ile uumi o lima male mauluga ole alii Tonga, ile mae‘a ai o taamilosaga e 6, na auaufaatasi faamasino e tuuina atu le manumalo ia Junior Fa i ‘ai e 60 ile 54.
E ui i lea, e ao ona to o tatou pulou ile toa o Alapati. E puupuu le taimi na tapena ai Aasa mole fusuaga, ina ua lē maua e Duco Events se paga e fusu ma Junior Fa, ona fesootai ai lea ia Alapati Aasa ma ia talia, ole a la fusu ma Fa.
E iloa le lē sauni o Alapati i lona mamafa na iai, male sela na vaaia. E fai si ona mamafa tele, 102 kilokalama ile po ole fusuaga. E ova atu lea male 5 kilokalama i lona mamafa masani, 97 kilokalama. E ui lava i ia tulaga, e lei solomuli ai le fusu a Alapati ile sailia ole malo. O ia na tuliloaina le Toga ile po atoa i totonu ole maea. O lona uiga, na solomuli le fusu a Fa ae na fusu savali lava Alapati ia Fa, e ui ina faigata ona ia osofai le alii Tonga ona ole maualuga male uumi o ona lima.
Ile ma talanoaga a‘o loma le fusuaga, na ta‘ua ai e Alapati lona manao e fusu i totonu. E na ole pau lea ole auala e maua ai sona avanoa e malo ai ile fusuaga. E iai taimi na sao ai o ia i totonu ole so‘a a Fa, ae lei umi se avanoa na ia maua e osofai ai, ae o nai avanoa na ia maua na sao atu ai ana tu‘i ile tino o Fa ma lavea foi le auvae i tu‘i a Alapati. Na maitauina foi le solasola ole alii Tonga ma piki lelei le taimi e togi mai ai lana so‘a male tu‘i sa lavea ai foi Alapati. Ole tulaga e pito sili ona lelei mo Alapati, ona sa mae‘a lelei taamilosaga uma e ono ole fusuaga. Na matuā leai ma se taimi na faapea ole a oti ai Alapati i totonu ole maea, mai tu‘i a Fa.
E ui na maua le tino male auvae o Alapati ile so‘a ale Toga, ae e lei pa‘ū pe palasi o ia ile maea. Ole mea moni ana faapea e tutusa maualuluga o alii ia, semanu e ese le faaiuga ole fusuaga.
Ole isi mea na iloa ai le lelei atu o Fa, ona o petipetiga ale TAB. E $1.40 mo Fa, ae $4 mo Alapati. Ile faia‘ina ai o Alapati, ua tolu ai nei le aofai o ana faia‘ina mai ana fusuaga e fitu. A‘o Fa, ua fitu ai lea o ana manumalo mai fusuaga e fitu.
