“Tautuanā ma outou oloo ta’ita’ia le tatou ‘au ia ao uma telefoni feavea’i pe a oo ile po”…Palemia
“A’o outou iai foi i taaloga nei aua ne’i galo ia te outou le tapuaiga a Samoa oloo nofo tatalo, ae o ituaiga mafutaga nei tou te auai oni mafutaga e tumu i faaosoosoga aemaise ole va feagai ai o autaaalo a tatou ma autaaalo a isi foi atunuu.
E lē mafai ona aveesea le mea lea o faaosoosoga auā e iai pea le tiapolo, e tupu lua pea le saito ma le titania ma e iai pea le tiapolo i nei mafutaga o tama ma teine i atunuu ese.”
“O tatou uma lava sa tatou talavou uma lava ma e iai foi uiga faatalavou o lea na matou omai ai o lea foi ei ia te outou, a fai mai se isi o outou e leai ni uiga faapena, oute ta’u atu a ole matuā pepelo o pepelo.
O lea foi na oo mai ia te au uiga o isi ta’ita’i sa o muamua, e iai a upu a tatou e fua mai mauga le manuia ose nuu, afai a e faatamala outou ia e ta’ita’i e faapena foi ona faatamala le autaaalo. Afai a e tafafaovale ta’ita’i e faapena foi ona tafafaovale atu ai ma le autaaalo”. Ole feiloaiga ale autaaalo a Samoa mo taaloga a Malo ole Taupulega ile masina nei ole a faia ile Gold Coast i Ausetalia, na masaa atu ai fautuaga tuusa’o ale ta’ita’i ole Malo i ta’ita’i ma le autaaalo, e ui e lei auai uma le ‘au ile feiloaiga ma le Palemia ile Aso Tofi na tea nei.
O fautuaga ma tima’iga e tapena ai le lotoifale ole ‘au e tolusefulufitu ma ofisa ma ta’ita’i e 30. Na toe faamanatu ile ‘au e le Palemia mea na tutupu i nisi o ‘au masii ale atunuu sa tausinio i taaloga a Malo ole Taupulega ma isi taaloga faavaomalo. Na afea ai ma fautuaga i fesootaiga televavave faaonapo nei ua mamafi ai tupulaga o nei ona aso. “O aso nei ua ese le mea ua iai ua mafai ona maua atu iinei tou mea oloo fai. E lē o iloa oloo nofonofo lava le isi tama taalo ma le isi teine taalo ma tuu uma i luga o lana telefoni, tuu i luga ole facebook, ma tuu i luga ole internet a outou mea nei e fai”.
Na faaalia foi e le Palemia ose tasi o fili numela tasi o ‘au masii ole oo ile po e lē momoe ae oloo ta’alo’alo lava i lana telefoni. Ole fautuaga ale Palemia ia ao uma telefoni pe a oo ile po ina ia lava le malologa a tama ma teine taaalo.
E fitu taaloga oloo tausinio ai Samoa e aofia ai faipelega, lakapi, siisii uamea mamafa, faataavale polo, aau, afeleti, ma le fanafana.
Ole lu’i ale ta’ita’i ole Malo ile ‘au atoa ia manatua o taaloga a Malo ole Taupulega e nao le 54 atunuu e tausinio ai, ae o taaloga ale Olimipeka e sili ona maualuga lona tulaga e 190 atunuu ole lalolagi e ‘auai a latou tagata taaalo silisili ona lelei.
