Na tele tuatuagia na pisi ai le toatele o tagata i le afiafi faaiu e faamavae atu ai i le 2015, ae na tulimatai nisi o le matagaluega Katoliko a Kuiniselani e osia se taulaga paia o le Misasa i lea afiafi, e lē gata e faamavae, ae toe faafeiloai atu ai i le oo mai o le 2016.
Na taitaia lava lea Misasa e le afioga ia Patele Epati Tamati o loo tausia le Matagaluega Katoliko a Kuiniselani.
O le taulaga sa nafa ma le ekalesia a Woodridge, ma o le latou falesa foi sa faia ai le sauniga i le Palisi a St Pauls.
O le faanofoaliiina o le Tusi Paia sa faatinoina e le Ekalesia a Acacia Ridge, sa faatinoina lava tu ma aganuu faapea le taupou ma aga masani auā le momoliina o le taulaga.
O viiga o le Atua sa lagiina lava e le Ekalesia a Woodridge i lalo o le taitaiga a le taitai pese, le faletua ia Salu Hunt ae o le tapiano o le susuga ia Junior Apulu Taulaga‘aua.
O se tasi lea o sauniga poo se Lotu faamatagaluega sa tauaofia ai le toatele o le Ekalesia i Kuiniselani, o le vaeluaga o le tausaga fou. E iai lava taimi e tuufaatasi ai le Matagaluega i nisi o Misasa i ana tauaofiaga masani.
O le afioga ia Leota Tominiko, o ia o le Peresetene o le Ekalesia Katoliko a Woodridge, o le sui Perersetene foi o le Matagaluega a Kuiniselani, sa ia faafetaia le mamalu e fia o Samoa, sa ia valaaulia faapitoa ai foi le aofia ina ia auai uma i le taumafataga i lea afiafi, o ia foi sa fai ma fofoga o le po.
Sa matagofie lea afiafi auā na auai Sister Masela o ia o le Pule Aoga a St Marys i Savalalo i Samoa, na malaga asiasi mai i ona auaiga. Sa auai foi Sister Atonia ma Sister Elisapeta ma le toatele o tagata lotu mai isi Ekalesia Katoliko ma sui o isi Divine Mercies.
E faia lenei Misasa o loo malaga i Samoa le Peresetene o le Matagaluega Katoliko, le susuga ia Faamatuainu Ili Taualai.
O le laulau o lenei paeaiga, o le Peresetene o Faamatuainu Ili Taualai; o le Sui Peresetene o Leota Tominiko; o le Failautusi o Salu Hunt; ma le Teutupe o Koko Lave.
