E lē o toe tele ni aso o Novema o totoe ona laasia lea ole masina o Tesema 2017 e faatino ai le faiga faavae fou ua faataoto ele Minisita ole Matagaluega o Leoleo le afioga ile Palemia susuga Tuilaepa L Sailele Malielegaoi, ole faamuta lea ona toe galulue faatasi ulugalii leoleo oloo galulue faatasi nei ile matagaluega.
Ua tuua’ia e le Palemia Komesina ua mavae ole matagaluega i lo latou faimea tuu ile tapu lea ona galulue faatasi se alii ma se tamaitai ose ulugalii ua faaipoipo faaletulafono. Ua tele tausaga o aliali mai le mau faaletonu ile matagaluega o leoleo sa fesiligia ai le itu i faaiuga fai ale pulega ma mea sa tutupu ma aafia ai le galuega faaleoleo ona ole faatasia ose ulugalii ile tautua faaleoleo aemaise o fanau ua galulue faatasi ma o latou mātua ile galuega ae faaopoopo iai ma le avatu o nisi o tauaiga o leoleo ua faapena ona galulue ai foi ile matagaluega.
Ole Komesina o iai nei o Leoleo sa aafia ini tuua’iga ma mafua ai ona faamalolo lē tumau a’o tālia ona moliaga na ave ile faamasinoga lea na toe faaui i tua e loia a leoleo na aumai mai Niu Sila ma lē mafai ai ona suesueina moliaga ole Komesina ma faapea ona faalēaogā ai ele faamasinoga moliaga.
Ole taimi na suesueina ai le Komesina sa tele masalosaloga o nisi leoleo ile aafia oni ulugalii leoleo ile taaviliga o ia suesuega. Ole mafuaaga lea ole tele ole gugulu na aliali mai ile lotoifale ole matagaluega. Sa silafia ele afioga ile Palemia faaletonu nei ma e lei leva ona toe see ane e tauave le vaaia ole matagaluega ae faailoa atu loa le faiga faavae ole tatau ona oo atu ile faaiuga ole masina fou o Tesema ua faia le filifiliga ale ulugalii oloo galulue faaleoleo, poo ai e nofo a’o ai e alu ese ma saili se isi galuega e faaauau ai le olaga galue.
Ua faailoa ise finagalo ole Palemia ile faaiuga ole vaiaso ua mavae atu nei, e lē na’o le matagaluega o leoleo e aafia ile faiga faavae ae aofia uma ai matagaluega ale Malo.
O lona uiga ise mātau iai, ole tasi lea o faafitauli oloo mafua ai ona tutupu faaletonu ile pulea o matagaluega ma faalapotopotoga ale Malo ole galulue faatasi ose alii ma se tamaitai oloo mafuta ose ulugalii ua faaipoipo faaletulafono.
Ose mataupu talu ai nei ile Matagaluega o Falepuipui ua aveese ai lē sa avea ma Minisita Lagolago o lea matagaluega le afioga Sooalo Mene ona o lona faletua oloo galue ile pulega o lea auaunaga ale Malo.
Ose mataupu na fesiligia ai ese tagata faigaluega ua faamalolo aafiaga ole faletua ile faatinoina o ona tiute ose tasi o pule lagolago ole matagaluega o falepuipui na oo ile Palemia ma faia ai suesuega.
O lea ua see atu le afioga Sooalo Mene ua galue ole minisita lagolago ole Matagaluega o Faamasinoga ae see ane le tofa Lenata’i Victor Tamapua e avea ma Minisita lagolago o Falepuipui. Ile Matagaluega o Leoleo e tusa ma le 25 ulugalii o leoleo uma oloo galulue faatasi ai.
