E ta ane le ‘afa ole fitu ile taeao ole Aso Toonai ua mavae, ua leva ona lanumoana atoa le taulaga faatau i Magele ma feei pu o taavale ma faalealea solo fu‘a Samoa ale mamalu ole atunuu e faatalitali ai le taimi e alu atu ai le savali faaaloalo a tama taaalo ole Manu Samoa.
Ua faatumulia totonu ole taulaga i Magele ua oo foi i fafo ile paka o taavale ua tau saili ni nofoaga e paka ai taavale ile tumutumu ole mamalu ole atunuu ile fia maimoa lea ma fia molimauina le aso ua atofaina e feiloai ai le ‘au ale atunuu oloo faamemelo iai faapea ma le tapuaiga i Aukilani. O tuaa sinasina e oo lava i fanau ua tau faaofiofi atu i totonu ole stage ile fia mauaina lava ole ‘au ole paipa.
Ole itula e iva na to‘ai taunuu ai loa le pasi a tama ole Manu Samoa ile maota o Samoa i Magele ma amata faatulaga ai loa le savali e agai mai i totonu ole nofoaga oloo faamautu iai le mamalu o Samoa.
Ose taeao ese lea taeao i totonu o Magele ile taupati atu ole atunuu e faailoa lo latou titifaitama ile ‘au ale atunuu. Ua lanumoana faasoloatoa lea pitonuu ma ua poloka ai foi ma le feoai o taavale, a‘o alu atu le solo tele a tama ole ‘au ae oloo taitai atu ele Miss Samoa NZ le tamaitai ia Naomi Fruean faapea sogaimiti ale atunuu oloo latou aiaiuli atu.
Faatasi ai ma le afioga ile Konesula Aoao o Samoa i Aukilani, le afioga ia Faolotoi Reupena Pogi, ole faipule ia Aupito William Sio, ole afioga ia Toaletai David Tua faapea susuga i faafeagaiga sa faamalumalu atu ai i lenei solo tele.
Ua faaali le tulai faaaloalo ole mamalu ole atunuu ile taimi na taunuu atu ai le solo a tama ole ‘au faapea ma malo faaaloalogia, ona saunoa lea ole fofoga ole aso le susuga ile aoao ia Tavai Meni e faafeiloai le mamalu ole atunuu.
Ile saunoaga autu ole aso na saunoa faafetai ai le afioga ile Konesula ole sui vaaia ole malo o Samoa i Niu Sila nei, e faafetaia le mamalu ole atunuu ile opogi ma le tulai mai e lagolago le sailiga seleni mo le Manu Samoa, mai lava ile aso muamua sa faatauina ai ofu ile maota o Samoa i Magele, sosoo ai ma Avondale ma Otara, a‘o lea ua faaiu mai ile taulaga faatau i Magele, ae o lea lava e vaaia le lotulotu atu ole tapuaiga ale atunuu.
Na saunoa le afioga ia Aupito William Sio e fai ma sui ole malo o Niu Sila e fai lana faamanuiaga ile ‘au ale Manu Samoa faatasi ai ma upu faalaeiau i tama uma lava ole Manu e mafai ai ona latou manumalo ile ‘au numera tasi ale lalolagi le Olopeleki.
O tagata Samoa e ese mai lava o latou fatu mai fatu o tagata uma ole lalolagi
Ole saunoaga lea ale susuga ia Toaletai David Tua, na ia faamanatu ai i tama taaalo le tala a lona tamā a‘o sauni ini ana fusuaga. O tagata Samoa e ese mai lava o latou fatu i fatu o tagata uma ole lalolagi, aisea?
Auā e alualu le taaloga uma le malosi ae faaaogā loa le fatu. Ma le isi itu na lu‘i ai e Toaletai le Manu, “Oute iloa o outou e leai ni tou tupe o maua, ae o lo‘u talitonuga o o outou fatu lea ole a faatino ai taaloga ole a alo atu iai.” Na sosoo ma le tufatufaina o tickets o i latou na manuia o latou suafa ile Se‘i sa faia mo isi Aso Toonai lea sa faaatauina ai ofu ma faagasolo ai loa le saini o tama taaalo i mitiafu ole Manu Samoa.
Ole fesoasoani mulimuli ale atunuu mo lana Manu Samoa na latou tapenaina ai le Cooperate Dinner lea sa faia i Malaeola i Magele. E silia ile 70 laulau sa faatauina ile $1000.00 ile laulau ae sa lē faafiti ai le mamalu ole atunuu ile toatele o faalapotopotoga ma matagaluega sa faatauina a latou laulau.
Ua matagofie faafesagaiga ale atunuu i lea po ina ua auai mai ai le afioga ia Afamasaga Lepuiai Rico Tupai ole Minisita o Fesootaiga Faatenekolosi faapea le Minisita lagolago o lea lava matagaluega le Afioga Lealailepule Rimoni Aiafi. Ma o saunoaga fapitoa foi ia sa iai lea afiafi na momoli ai lo laua loto faafetai ma le agaga fiafia tele ile atunuu ona e latiti le taimi sa tapenaina ai lenei famoemoe ao lea oloo vaaia pea e sulu ole tino le faamaloulou mai ole atunuu e apogi le au ale Manu Samoa.
Tele foi nisi o faafiafiaga ma ausiva sa faafiafiaina le mamalu ole atunuu, ae faapea foi ile latou alofa tulai e ala lea i siva Samoa na saunia e nisi o faalapotopotoga o mafutaga a tama ma teine tuai o nisi o aoga ae faapea foi i nisi o kamupani.
Ole agaga faafetai ole afioga ile Konesula ia Faolotoi Reupena Pogi ile mamalu ole komiti o nisi o tamalii sa taulamua i lenei faamoemoe e pei ole afioga ia Muliagatele Faimalo Allan Stowers, ole afioga ia Galumalemana Tai Galumalemana, ole afioga ia Leaupepe Tala‘i Lene faapea a latou kamupani ona ole tele ole latou sao ile faafoeina o lenei polokalame.
Ae le gata i lea e lei faagaloina lava le toatele o nisi o kamupani ma nisi o tamalii faletua ma tausi, faapea le malosi ole atunuu sa latou galulue uma i lenei tapenaga mo le Manu Samoa.
