Ole itula e sefulutasi ile taeao ole Aso Sa na faatumulia ai le faletifaga ole Events Cinema i Liverpool ile faalauiloaina faapitoa ole ata tifaga iloga ole ‘Moana’ lea e autu mai ile afioga Seiuli Dwayne ‘The Rock’ Johnson ma le tamaitai Hawaii ia Auali‘i Cravalho.

Mo le silafia faatoa faaali lenei ata i faletifaga uma ile aso 26 o Tesema, ae ose vaaiga na iai ua atagia ai le moomia tele ele aumaimoa o lenei ata komi e pue ile Pasefika e aofia ai talatuu o atumotu Pasefika ma fagogo mai anamua ae ua faamatagofieina e Walt Disney. Ole alii pese iloga mai le Te Vaka ia Opetaia Foai na fatuina isi pese na faaaogāina i lenei ata maoae ua silia ma le $15.6 miliona ua maua ai.

Taupou sa maimoa ai tagata ia latou saasaaga

Taupou sa maimoa ai tagata ia latou saasaaga

Ose tasi foi o alii musika iloga na soifua ane i Ueligitone ma ua faamautu nei i Fiti ile iunivesite ole Pasefika ia Igelese Ete sa ia tuufaatasia nisi vaega o pese Pasefika na matagofie ai lenei ata.

Ile faamatalaina ole teineitiiti o Moana na soifua ane i lo latou motu ma filifilia ai e laveaia lo latou motu ma lona aiga pe afai na te sailia Maui ma o la faasaoina ai le atumotu. Ose tomai maoae na teuteuina ai lenei ata ma silafia ai le matagofie o tatou talatuu i ata tifaga.

Ole matau a nisi ile facebook, leitio ma talanoaga e lelei le ata ole a toe fafagu ai e tupulaga lo latou faasinomaga.

Sa vaaia ai foi nisi o fanauiti ua fia faapei o Moana e ala i o latou laei, ula ma le fu‘a a Samoa na o latou tauaveina i lenei faaaliga faapitoa.

Sa matuā maofa foi tagata papalagi ma nisi atunuu sa afifio atu e molimauina le ata i siva ma faafiafiaga Samoa ma le Pasefika na saunia e Priscilla Ale & Evana a‘o lei amataina le faaaliga ole ata o ‘Moana’ e pei sa maimoaina foi ele Faatonu ole Turisi Samoa i Sini nei, le Afioga Faalavaau Fasitau Ula ma le faletua ia Laina.