“O loo iai lava le atalii o Peseta i le kamupani o se faatonu ma se faisea, ma ua ou sauni e su le kamupani”…… Leuluaialii Olinda Woodroffe
Ua faatumau e le faamasinoga o talosaga toe iloilo poo le faamasinoga apili mo mataupu ile faamasinoga maualuga a Samoa, le faaiuga a le tamaitai faamasino o Tafaoimalo Leilani Tuala Warren, o le afioga Peseta Vaifou Tevaga, e le’o se faisea ma se faatonu o le kamupani nonu o le Local Partners and Associates.
O le faaiuga lea na fofogaina i faaiuga o le tausaga ua mavae ina ua ma’ea suesueina le tagi a Peseta na finau ai o ia o se faisea ma faatonu o le kamupani. Sa ia momoli ai foi i lea tagi ma tuuaiga o faiga faaalatua i le va o isi faatonu o le kamupani e pei o le tofa Apulu Lance Polu, le susuga Martin Schwalger, ma le susuga Laauli Leuatea Polataivao Schmidt.
O ia foi tuuaiga na agiga ai ma le suafa o le faletua o Laauli i le talaina o siaki tupe o le faatauga o le sua o le nonu.
O le mafuaaga lea o le toe talosaga o Peseta e ala i lana loia le afioga Leuluaialii Olinda Woodroffe i le faamasinoga apili e toe iloilo le faaiuga ma ave ai ma mau e faapea sa tatau ile faamasino na faia le mataupu ona faailoa ona aafiaga poo conflict of interest i le susuga Laauli Leuatea, ona ao avea le faamasino le afioga Tafaoimalo Leilani ma loia sa ia tauaveina mataupu a le susuga Laauli.
Sa momoli foi i le apili a Peseta e faapea o le faaiuga na taunuu iai suesuega a le faamasinoga maualuga sa pito tasi ma faaitu’au ona o sootaga a le faamasino ma le itu tetee. O le aso Faraile ua mavae na lauina ai faaiuga o mataupu sa suesueina e le faamasinoga apili, ma ua faamautu ai le faaiuga o Peseta Vaifou e le o se faisea ma se faatonu o le kamupani nonu. Ua teena ai le apili ma ua mautu ai le mau na momoli e isi faatonu na faasaga iai le tagi o Peseta e le o se faatonu ma e leai se feiloaiga na faia na aveesea ai le atalii o Peseta o se faatonu ae suia i lona tuaa (Peseta Vaifou Tevaga). Ua faaalia e le tamaitai loia le afioga Leulua’ialii Olinda Woodroffe ua sauni e su isi faatonu o le kamupani nonu e momoli ai tuua’iga na ave ile tagi a Peseta. “Talu ai o loo tumau pea le atalii o Peseta o se faatonu ua avanoa ai pea ona faaauau le finauga i lalo o le igoa o Danny le atalii o Peseta”.
O le autu o le su e pei ona faaalia e le loia o tupe ua le maua e Danny mai le faagaioia o le kamupani nonu o le Local Partners and Associates. Sa taumafai e aumai se finagalo o le alii loia o Semi Leung Wai sa finauina le tete’e a isi faatonu i moliaga a Peseta peitai na saunoa mai le loia pe manumalo pe faiaina se mataupu e tulai ai, e le mafai ona faia sana faamatalaga.
