O le Aso Faraile na tea nei na faamauina ai le lua o vaiaso talu ona amata le faatalaleleiga a tupulaga talavou a le Matagaluega SISDAC a Kuiniselani. O le Region a Simeona lea e aofia ai Newtown, ma Bell Bird Park sa feagai ma le faatinoina o tala faaleagaga ma pesepesega logo mālie, sa mālie ai le faafofogaaga a le toatele aemaise o ē sa asiasi atu. O le susuga ia Pastor Faamalologa ma le faletua ia Tamara o loo tausia ia ekalesia.
E tele ni feau tāua sa faatāua lava i totonu o aiga. O le tala faamomoiloto na amata mai i le uluai vaiaso ina ua tuua e le tamā si ona toalua ma si a la fanau ae valaauina o ia e avea ma fitafita o le taua.
Na amataina e le Levi Region ae o le vaiaso ua tuanai na faaauauina e le Region a Simeona. O se vaega e tulimatai i ai le toatele i le faaauauina ma le sosooina o le ata i le aiga o le tina ua tuua nei na o ia ma le fanau e toalua ae ua malaga ese atu le tamā i le taua.
O le tulimatai o le tina ma le fanau e toe feiloai atu i le tamā ina ua sauni e toe taliu atu i le aiga ae maua loa se tala faanoanoa ua maliu lava i le taua, ae o le fatu na ia totōina i totonu o le aiga e olaola pea.
O le lauga sa fofogaina e lana auauna, le faifeau lava a le autalavou, le susuga ia Pastor Johnny Siofele. O le vaiaso nei o le a tulimatai le toatele e maimoa ma faafofoga i tapenaga a le region a Reupena lea e iai ekalesia a Annerly ma South Side ae faaiu ia Asera i le vaiaso fou o loo iai aulotu a Leichhardt ma Kingswood.
E tāua tele lenei vespers i tupulaga talavou a le Matagaluega SISDAC a Kuiniselani auā o se toe faatalaleleiga ma se toe faafouga i le toatele o alo ma fanau. E iai le talitonuga o le faifeau ma le komiti faafoe a le Autalavou e tatau lava ona iai ni avanoa e fai ai nei faatalaleleiga ina ia saga faamalosia ai pea le olaga tautua o i latou e lē gata i la le tino ae silisili i la le agaga.
O loo faia lava lenei polokalame i le malumalu o le matagaluega SISDAC a Kuiniselani i lona nofoaga autu i Bell Bird Park. Momoli le agaga faafetai tele i sao tāua o tupulaga talavou ae sili ona faafetai ia i latou o loo taupata atu ma molimauina lenei polokalame faagasolo o loo faasavali i le masina o Iulai o lenei tausaga. Tau ina ia agalelei le Atua ma avea o se fatu e pa‘ū atu i se eleele lelei, ia tupu ma ola ma ia faamanuiaina ai se agaga ua galala. Talia soo se tasi e fia auai atu ma faafofoga i po o Aso Faraile taitasi.
