Ua lē asa lava se tausaga ma fai meaalofa le afioga i le alii pule ia Galumalemana Tai Galumalemana ma lana faletaavale o le G-Mana Wholesale Autos mo tina uma o le atunuu.
O lenei faamoemoe ua avea lea ma faatāua i lenei kamupani i o tatou tina. Ae o lenei tausaga ua mafai ona tuufaatasia ai ma tina mai Tonga e ese mai ai i tausaga ua alu lea sa faatāua lava na o tina mai Samoa. Ma o se aoaoga lelei foi lea ua mafai ai ona maua se mafutaga ma se feiloaiga ma felosipi ai tina o atunuu nei e lua.
O le Aso Toonai ua mavae 9 o Me na faia ai lenei faiga meaalofa i le lotoā o le G-Mana 1 i Otahuhu, lea na tumutumu ai tina e silia i le 80 ma tamā sa auai atu e momoli atu a latou tautoga.
Sa faapea foi ona faatasi mai ai ma le afioga i le Sui Ao o le malo o Samoa ia Tuimalealiifano Vaaletoa Sualauvi II ma lana masiofo. Na vaaia i lea mafutaga tina ua 70 tausaga le matutua o latou soifua, o tina taitoatasi ma tina laiti.
O le itula e 1 i le aoauli e amata ai le polokalme, ae ta le 10 i le taeao ua leva ona nofoia nofoa o le G-Mana. O musika vavevave ma le tu‘itu‘i a le G-Mana Band na faanofo filemuina le usuai atu o tina i lea taeao.
O le aso faapitoa mo tina, ae vaaia ai ma tamā o loo faaofiofi ai foi i nofoa sa saunia mo tina. Ua sa‘o ai le upu a le isi toeaina, e lē faia ai se fiapoto o se isi pe a leai se tina ma le aiga, poo le vave maua foi i le ma‘i manatu pe a atoa le aso ua lē vaai ia Mummy i le fale.
O le afioga ia Patele Father Andrew sa fai ma ositaulaga i lea taeao e sii le taulaga faafetai i le Atua ona o le faamoemoe mo tina, o le faamanatu ma le fagufagu a le taitai i tina, i le tāua o latou i totonu o aiga nuu ma ekalesia, aemaise foi o latou o le pae ma le auli, e faamafolafolaina ni mea e faaletonu.
O le maualuga o le aso, o le saunoaga faapitoa a le afioga i le masiofo, na ia lui ai foi i tina uma mai Tonga ma Samoa tatou te mafaia mea uma i le faatasi mai o le Agaga o le Atua, o a mea faigata ma le lavelave faalagolago i le Atua e maua ai le malosiaga.
Na ia faaamuia foi i tina i totonu o Aukilani o loo latou maua lenei avanoa e fiafia ma mafuta faatasi ai ma faamanatu le aso ua faapitoa mo latou, auā o Samoa e leai ni avanoa e maua faapenei. O le fofoga o le aso o le tamaitai o Nerid Lima ae sa vaavaalua ma le tamaitai mai Tonga.
O faafiafiaga o le la o Samoa na suia ai le maimoa ma le silasila a tina, ae faapea foi i le mālie o siufofoga o le faili a le G-Mana na vaovaogata ai ma le isi loomatua i lona nofoa i le kepu faasolo atoa.
E 50 faailoga tupe ta‘i $50 na faia ai le Se‘i ma pepa voucher e 40 na saunia uma e lenei kamupani auā lava meaalofa mo le aso o tina.
Na matuā faamalieina loto o tina uma sa auai i lenei faamoemoe, auā ua maua fua ai le tupe ma le taumafataga, ae lē gata i lea ua maua ai foi ma le avanoa e feiloai ai i le afioga i le masiofo a le Sui Ao o le malo o Samoa.
Na momoli lo latou agaga faafetai i le afioga i le alii pule ia Galumalemana Tai Galumalemana ona o lana tautua matavela i le atunuu aemaise o lenei polokalame ua iloa ai le aso o tina. O le saunoaga mulimuli a le afioga i le Sui Ao o le malo ia Tuimalealiifano Vaaletoa Sualauvi II na faafetaia ai foi i le kamupani a
le G-Mana i le manatu i tina, faatasi ai ma lana faamanuiaga i tina uma o Samoa ma Tonga sa auai.
