E tala ave Samoa i le saili malo o ona tagata, ua lē gata i taaloga ae o le sailia foi o le poto salalau i aoaoga, e maua ai galuega lelei ma le manuia mo aiga aemaise o le Ekalesia.
Soo se tagata e faaeaina lona taumafai ma tini lau o lona faamoemoe, e siitia ai le tulaga faaeaina o le aiga, ae o se ‘ai lelei foi lea mo le tapuaiga a mātua sa tu‘i le mulipapaga ma tapuaia faiva sa feagai ai.
O le afiafi o le Aso Gafua 12 o Oketopa sa faataunuuina ai le tufaga faailoga o le Manurewa Youth Workers Network Inc i le Te Matariki Clendon Community Centre i Clendon. O le 4 ai lea o nei sauniga talu ona amata i le tausaga 2009.
O lea tufaga faailoga sa tauaaoina atu i nisi o tamā ma tina aemaise o tupulaga talavou o loo galulue ma lagolago malosi mo alo ma fanau talavou o le Pasefika ma Maori i totonu o faalapotopotoga eseese faapea aoga maualuluga i totonu o Manurewa ma Clendon i Manukau. Ma o loo lagolago malosi foi lea faalapotopotoga e le Auckland City Council.
I lea sauniga sa maua ai e le tamaitai o Adrienne Belford mai le EFKS Greenlane se faailoga e aloaia ai lana auaunaga i alo ma fanau a Manurewa High School mo le lagolago atu ma fesoasoani i lo latou ola taumafai. Ua silia nei ma le 5 tausaga o galue lea alo o le atunuu faa-Youth Worker i Manurewa High School, ma e 6 ni faailoga sa ia mauaina i tausaga ua tuanai.
O le 11 o faailoga faapitoa sa faatino i le fesoasoani mai a Kamupani ma Faalapotopotoga e pei o Solomon Group, Key Assets, MindShift Multimedia, Manurewa Youth Council, Youthlink, Whanau o Tumanako, Manurewa Marae, CYF Youth Justice ma le Academy of Vocational Studies NZ. Ma o le toatele o i latou sa maua faailoga o loo galulue ai i totonu o nei kamupani.
E tai lua tausaga ma faia nei tufaga faailoga e molimauina ai le auaunaga o le Youth Workers mo tupulaga talavou. O ofisa o le Manurewa Youth Workers Inc e aofia ai le latou Chairperson Huia Schuster – Teuira o le tamaitai Samoa/Maori, o le failautusi o Emily Harrop, ma se tasi o tamalii Samoa o Fale Fale mai le Youth Justice.
