O lea ua savali nei ile lua tausaga talu ona amata le polokalame lenei o suega ale fanau ale Fono Samoa Aoga Aso Sa i Aukilani. Ole tausaga ua mavae na sola ai le Aoga Aso Sa a PIC Avondale male talita ole aotelega o togi ale fanau poo tamaiti e tele latou sili ile Aoga Aso Sa, ae ole laugatogi o lenei tausaga ua pepese fiafia ai le Aoga Aso Sa mai North Shore ona ua malo ile aotelega o fanau e tele a latou sili.
Ole Aso Toonai 27 o Aukuso, na tolaulauina ai togi o fanau sa sueina suega ole Aoga Aso Sa i lenei tausaga, e toatele fanau sa auai i lenei faamoemoe ona ole galulue faatasi o mātua ma faiaoga Aso Sa e tulei fanau e suesue ma sailiili ile afioga Paia ale Atua ona ole naunautaiga ia maua i nei fanau nisi taitai lelei e iloa le faasamoa ile Tusi Paia auā le galuega ale Atua ile lumanai i totonu ole Fono Samoa PIC. E lima Ekalesia oloo auai i totonu ole Fono Samoa e aofia ai Glen Eden PIC, North Shore PIC, Panmure PIC, Papakura PIC, ma Avondale PIC, ma o nei aulotu uma oloo iai o latou sui poo fanau i totonu o nei suega.
Na amata mai aoga ale fanau ia Fepuari ile amataga ole tausaga ae faatoa fai suega ia Iulai e suesue ai mafaufau o fanau i mataupu sa aoaoina ai.
E amata mai i fanau ile 2 tausaga e oo atu i luga ile 20 tausaga oloo auai i nei suega. Ole susuga ile faafeagaiga ia Apa Lealiifano mai le PIC Glen Eden, ole taitaifono faaagaga mole Fono Samoa ile tausaga fou sa ia taitaiina le laugatogi ale fanau ile sauniga lotu puupuu.
Na sosoo male tolaulauina o togi ale fanau ona alo lea ile iputi māmā auā le faamalositino.
O le susuga ia Lufilufi Manuo Failautusi Manuo, sa fai ma sui o matua e faaleo le agaga faafetai o matua i faiaoga ma le komiti, e tusa ai ma le latou galuega fita sa finauina ai fanau ina ia maua so latou lumanai manuia ile aoga Aso Sa, aua e iai le talitonuga o matua e iai isi fanau o le Ekalesia o le a valaauina e avea ma faifeau ile lumanai.
Ae sili ai le tāua o lenei mataupu ole a toe faaofi ai se leo o mātua i totonu ole Fono Samoa ale PIC e tatau ona tuu atoa le lagolago malosi ole Ekalesia i lea pitolaau ole galuega.
Ole faletua ia Sailau Simanu oloo avea ma taitaifono ole Fono Samoa Aoga Aso Sa, faatasi ai ma lana komiti ia La‘u Tinai, Christina Smith, faapea male susuga ile tiakono ia Samoa Samoa.
