O le uluai vaiaso o le polokalame mo sui sinia o ofisa o le Malo ma kamupani tumaoti lea e faaigoaina o le Taimua Samoa, na valaaulia ai le alii Palemia ona o le manaoga e faamautu mai fuafuaga a le malo mo le isi lima tausaga.
O lenei aoaoga na faia ile fale fono o le maota o Tui Atua Tupua Tamasese Efi i Sogi, ma na valaaulia ai taitai o ofisa eseese ina ia faasoa i o latou tofiga ma tiute faataitai.
O le valaaulia la o le Palemia na fesiligia ai loa e le susuga Tuilaepa Fatialofa Auelua Lupesoliai Sailele Malielegaoi le au aooga e tusa ma le to‘a 20, poo ai na maimoa ile televise i polokalame faalauiloa a le HRPP ia na faalauiloa ile agai atu ai ile faigapalota tele a le atunuu. E leai ma se tasi na maimoaina ia polokalame ae na ta‘ua e le Alii Palemia e faalima ona alu atu i luga o le televise ia polokalame.
O le mafuaaga lea o le toatama‘i o le alii Palemia ma faapea mai, “O outou la isi faavalevalea ia e iai nei. Faafefea ona tou mananao e iloa galuega a le Malo pe afai e leai ma se isi o outou na matamata i polokalame ia na alu atu uma ai fuafuaga faataatitia a le malo?” o le fesili lea a le Alii Palemia.
Faaalia e le Palemia e taua tele le iloa o mea o loo tutupu i le atunuu ma e tatau i tagata nei ona vaavaai i le televise ma maua uma lipoti mai isi vaega o ofisa faasalalau ma lomiga aua le malamalama atili i le tulaga o iai le atunuu.
“Ana ou iloa tou te lei matamata ou te lē sau nei,” o le saunoaga lea a le alii Palemia. “Taumafai e matamata le news, ae lē o le matamata o isi polokalame ma ata lē lelei,” o le faaopoopo atu lea a le taitai o le atunuu.
O le atugaluga o le Palemia ona o le amio lenei o le lē faatāua o le suesue i totonu lava o Samoa e tauave lava i tofiga e pei o ofisa sili o le malo, ma e lē mafai ona lelei ni atinae o Samoa pe afai e solomua i taitai le lē anoanoa o fesootaiga ia e faailoa ai polokalame ma fuafuaga a le malo poo se Itu Agai foi.
O le Taimua Samoa e filifili mai ai sui sinia o matagaluega eseese a le Malo atoa ai ma pisinisi tumaoti, o i latou nei ua iai le talitonuga o le a avea ma taitai o le atunuu i nei ofisa eseese ile lumanai.
E 10 masina e aooga ai i latou nei i vaega eseese o atinae o Samoa ma silasila ai i luitau ua vaaia le tulai mai pea ma avea ma auala e lapelapea ai le atinae o le tamaoiga o le atunuu.
O nisi o fautuaga a le alii Palemia o le mafai e i latou nei ona galulue e lē faaitu‘au ma ia sa‘o ma faamaoni i tofiga ua maua ae aua le faaaogā sese nei avanoa.
O mataupu uma na lāgā e le Alii Palemia, na ta‘ua e le Ofisa Sili o le Taimua Samoa; Seumanu Douglas Ngau Chun, o loo galulue ai ma fai foi ma taiala ai a latou polokalame faataatitia.
