Ua aumai le iuga ale faamasinoga faaitumalo a Melepone ma ua faatonuina ai le tamaitai Adele Faaosofia e totogi atu se vaega tupe e tusa ma le $30338.91 ile CANTOA, ina ua ioeina ele faamasinoga le finauga ale CANTOA, ua soli e Adele Faaosofia le konekalate na malilie faatasi iai ma le CANTOA.
E le o toe po malae ile atunuu ile mataupu lenei, ona o vevesi na tulai mai ile tauvaga e sailia ai se tausala o Samoa i Melepone le Miss Samoa Victoria Beauty Pageant sa faafoeina ele CANTOA. O ia vevesi na iu ai ina musu le tamaitai o Adele Faaosofia e avea le CANTOA ma kamupani lagolago mo ia, ile tauvaga ole Miss Samoa 2017.
Ole faamamulu ese o Adele Faaosofia mai le CANTOA na afua ai ona agai le CANTOA ile faamasinoga, ona ua solia e Adele Faaosofia aiaiga ma tuutuuga ole konekarate na afua ai ona maua lona avanoa e tauva ai ile tauvaga ole Miss Samoa Victoria Beauty Pageant.
Ole iuga ale faamasinoga ua tuuina mai, ua le gata ina faatonuina ai Adele Faaosofia e totogi le $30338.91 ile CANTOA, ae ua faailoga fesili ai foi ma le avea pea o ia ma Miss Samoa Victoria. Na ta’ua ele CANTOA e ala ise pepa o faamatalaga e faapea, ole tamaitai o Irene Mona Siania ole Miss Samoa Victoria aloaia lea.
Na ta’ua foi i lea lava pepa o faamatalaga ale CANTOA, le agai atu ole mataupu lenei i Samoa, ma ole a latou taumafai foi e molia uma ile faamasinoga faalapotopotoga ma tagata taitoatasi na fesoasoani ia Adele Faaosofia i lona tauva ai ile Miss Samoa 2017.
E tusia lenei lipoti e lei maua se feiloaiga ma le tamaitai ia Adele Faaosofia, e iai le
faamoemoe ole lomiga ole vaiaso fou, ole a maua atu ai se faamatalaga ale tamaitai o Adele, e tusa ai ole iuga ale faamasinoga e pei ona faamatuu mai nei.
