Ina ua mavae le oti o Mose, ona fetalai lea o le Atua ia Iosua, “Ia e tulai ma sopoia atu le Ioritana lena, o oe atoa ma lenei nuu uma.”
O le autu lena o le aso ananafi, a o sauni le susuga i le taitai aoao a le ekalesia a le Samoan AOG i Ausetalia, susuga ia Kiki Taulapapa faapea le komiti faafoe, auā le faapaiaina o le tofi faifeau, o le susuga ia Amataga Tamamasui Imo faapea le faletua ia Faye.
Oi laua ia ua tofiaina e le Atua la te faaauauina le leoleoina o le lafu mamoe a le Atua, i totonu o le ekalesia a le Samoan AOG i Inala, Brisbane nei, e pei ona avanoa ai le nofoa o Mose, e ala i le valaau Paia a le Atua, i le susuga i le toeaina ia Alaivanu Toma, e pei ona iai le faaiuga o le tausaga na mavae atu nei.
Sa auai mai le susuga i le taitai aoao ia Ps Kiki Taulapapa, mai Sini i Niu Sa Uelese faapea le susuga i le sui taitai ia Onesemo Pulepule ma le komiti faafoe a Ausetalia aemaise nai o latou faletua.
Sa faatasi ai foi susuga i Faafeagaiga ma faletua o le pulega a Kuiniselani, faapea foi le paia i aiga ma uo.
Na mae‘a le sauniga faatasi ai ma le faapaiaina o le susuga i le faafeagaiga ia Amataga ma Faye Imo, ona alo loa lea i le taliga o le sua.
O le tofa ia Alofipo Kolisi Matila sa avea ma fofoga o le aso, a o le afioga ia Taefu Lio, sa saunoa e tusa ma le aso, aemaise ai faaaloaloga masani, auā le aufaigaluega a le Atua.
O le susuga i le Faafegaiga ia Amataga Tamamasui Imo o le lupe faalele a le alalafaga o Poutasi i Falealii, o le paia lava lea i le susuga ia Tuatagaloa o le Sa‘o fetalai, o le Toosavili, o le ki o le malo. Tainane foi lau afioga Meleisea o le Sa‘o Aualuma. Afio Leilua faapea le matua ia Fanene. Aemaise le paia ia Lufilufi ma lou Tapaau o le Tuisamoa.
O le faletua ia Faye o le lupe faalele a le alalafaga o Tiavea Aleipata. O le paia lava lea i lau susuga Tuiavii ma Usoalii, Lau susuga Valai ma le Taauso ma le nofo Ma‘opu. Mamalu ia te oe le Fale‘ulu, ma upu ia te oe Saleaumua.
O faamatalaga na tuuina mai
