O le tele o tausaga ua mavae, o le ofisa o faigapalota sa i totonu o le ofisa o le Fono Aoao poo le Legislative Office i Mulinuu. O le aufaigaluega a le Fono Aoao o latou foi ia e galulue i le ofisa o faigapalota pe a oo ina faatino ni faiga filifiliga a le atunuu e sailia ai tofi faipule o itumalo i le Palemene.
O latou foi e tutulai i le faamasinoga pe a tuuaia i ni tagi o faiga solitulafono o le palota. Peitai ina ua amata ona palota tagata ua aulia le 21 tausaga ma faaopoopoina le numera o tagata palota i totonu o itumalo, e lē pei o aso o palota na o matai, na aliali mai loa nisi o tuuaiga o faiga lē lelei i le ofisa o faigapalota.
O fautuaga a komisi suesue pe a mae‘a palota tetele a le atunuu i lena vaitaimi na aveesea ai loa le ofisa o palota mai le ofisa o le Fono Aoao faitulafono, lea na faatuina ai loa le ofisa o le Komesina o Faigapalota.
O le lipoti a le komiti a le Palemene sa suesueina teuteuga o le tulafono o faigapalota ua latou fautuaina le Malo e ala atu i le Palemene ina ia toe tuufaatasia le ofisa o faigapalota ma le ofisa o le Fono Aoao.
O se faiga o le a toe faaaogā ai tagata faigaluega i se tulaga e faaaogā tatau i le faia o tapenaga o faigapalota, ma toe faaaogā foi i galuega a le Fono Aoao faitulafono pe a mae‘a ni faigapalota.
O lona uiga o le a tatou toe foi i le mea tuai, lea e avea le failautusi o le Fono Aoao poo le Clerk of the Legislative Assembly ma Ofisa Sili o faigapalota, pe afai o le a toe soloia le tofiga Komesina o Faigapalota.
E pei ona silafia o loo tatali nei i se faaiuga a le Kapeneta i le fautuaga a le Komisi e pulea tagata faigaluega a le Malo poo le PSC, ua tuuina atu i ai, e tusa o suesuega sa faia faasaga i le Komesina o faigapalota le susuga Papalii Malietau Malietoa o loo faamalolo pea lē tumau i le taimi nei.
O tuuaiga o le faaaogā sese o le malosiaga o le Komesina o faigapalota e faatino ai nisi o gaioiga ua masalomia ua solitulafono, e faasino i ni alauni o ni fonotaga sa auai le Komesina i atunuu i fafo.
E lei toe maua mai se faamatalaga i le PSC poo ua oo atu i ai se faaiuga a le Kapeneta, ae o le taimi mulimuli na fesootai atu ai le tusitala i le Pule sili o le Komisi e pulea tagata faigaluega uma a le Malo i le masina na tea nei e faatatau i le mataupu, na ia faailoa mai ai e lei oo atu lava se finagalo o le Kapeneta.
O loo nofo pogisa nei le aufaigaluega a le ofisa o le komesina o faiga palota i le lumanai o le ofisa, peitai ua manino mai i le lipoti a le komiti faapalemene sa tolaulauina i le Fono Aoao i le Aso Faraile ua mavae, ua iai le fuafuaga e toe faasee le ofisa o palota i le ofisa o le Fono Aoao faitulafono.
E iai le talitonuga o le a faatino lea tulaga i se taimi o le tausaga nei a o lei faia le palota tele o le tausaga fou 2016.
