O le taeao o le Aso Toonai na tea nei 04 o Aokuso na potopoto uma ai itutino o le asosi o fusuaga a Samoa i le maota o Papalii Pasi Poloa i Vaitele mo le faamoemoe e faia ai se leleiga mo le fusuaga a le atunuu talu mai ni nai eseesega na tulai mai e pei ona oo ai i luma o le faamasinoga mo sana faaiuga.
E pei ona silafia, na ave ai se tagi a le Peresetene talu ai o le SABA, le susuga Fesola’i Vaaiga Tuigamala i le sese ona faatino o le suiga tofi o le laulau talu ai a le Asosi fusu a Samoa na mafua ai ona aveese o ia mai i le tofiga Peresetene, lea na faatonuina ai loa e le Kapeneta le tuuina atu o lenei mataupu i le faamasinoga o taaloga.
O le faaiuga e pei ona tuuina mai e le faamasinoga o taaloga na soloia uma ai le laulauafono a le asosi fusu na iai, ma tofia ai loa se komiti fou le tumau e toafa e gafa ma le tapenaina o le faavae o le asosi fusu mo le umi e 8 vaiaso. O lea komiti fou e aofia ai le sui o le maea fusu a Malisi le susuga ia Laulu Tuugatiti Leauanae, Papalii Pasi Poloa o le maea fusu a Upolu Savaii, Leituala Tapusoa Fifita o le maea fusu a Tumua ma Pule ma Fesola’i Vaaiga Tuigamala o le maea fusu a Plantation.
I le sauniga i le Aso Toonai na tumutumu ai sui o maea fusu taitasi, o alo ma fanau taaalo, o mātua ma le toatele o i latou na agai atu e molimauina lea faaleleiga. Na amata le polokalame i se sauniga lotu e pei ona taitaia ai e Patele Mikaele Tuimavave. Na ave le faamamafa a Patele i le tāua o le loto gatasitasi aemaise lava ia i latou o faauluuluga o fusuaga a le atunuu.
Na ave foi le avanoa e saunoa ai sui taitasi o le komiti ma o latou faamamafa ai le tāua o le galulue faatasi mo le lumanai manuia o fusuaga a Samoa. Na faapupula foi e le komiti fou lenei nisi o polokalame mo fusuaga a Samoa faatasi ai ma teuteuga o loo faia nei i le faavae o le asosi fusu a le atunuu.
O se tasi o vaega na faamanino mai e le komiti fou lenei, o le faaauau ai pea o le nofoaiga a le latou komiti mo le isi 12 masina ona faatoa faia lea o le filifiliga o tofi o le asosi fusu, ae ave uma le taimi e tapena ai se au fusu malosi a Samoa mo taaloga a le Pasefika e talimalo ai le atunuu i le tausaga fou.
O se mataupu na matuā teena e nisi sa iai muamua i totonu o le komiti o fusuaga a Samoa le susuga ia Aualiitia Faafouina Milford ma ia ta’ua ai, e solitulafono le faiga fou ua faia nei e le komiti fou lenei, ona e tusa ai ma le faaiuga a le faamasinoga e na’o le valu vaiaso e tatau ona nofoia e le latou komiti. Na atagia foi i le saunoaga a le failautusi talu ai le susuga ia Faletolu Su’a le tatau lea ona faatoese o Fesola’i Vaaiga Tuigamala e tusa ai ma le faafitauli na tulai mai.
Ae i le tali a le sui o le komiti fou lenei le susuga ia Leauanae na ia ta’ua ai, e talia uma fautuaga ua tuuina atu ma o le a toe iloilo ai e le latou komiti, ona toe logo ai lea o itutino o fusuaga i le lumanai.
E moni o se faaleleiga na faaupu ai lenei faatasiga peitai e faamaonia e le tatou nusipepa le iai pea o nisi o lagona lē fiafia mai nisi o sui o le asosi o fusuaga. Tatou tālia pea poo fea o le a fai iai lenei komiti fou pe faaauau ai mo le 12 masina, pe o le a toe vave ona faia se isi sailiga tofi i se taimi lata mai.
