O le po o le Aso Faraile na feiloai ai le Komiti faafoe a le Miss Samoa Ausetalia ma tamaitai e toa 4 ua alo atu e saili ai se lalelei o Samoa i Kuiniselani. Pei ona silafia o loo paleina le pale e le tamaitai o Kristle Vaigalepa Leo, o le alo o le faafeagaiga EFKS susuga ia Rev Pevise & faletua ia Shirley Leo.
Sa toatele le mamalu o le atunuu sa auai i le afiafi o le Aso Faraile 11 o Iulai. O le sauniga lotu sa taitaia e le taitai o le Ekalesia AOG Church of Samoa a Ausetalia le susuga ia Ps Taeauga Ropati Frost.
Na alo atu mo le se‘iina o numera e iloa ai le tamaitai ma lona taimi, ma amata ai loa le ava o feiloaiga sa faatautaia e le faafaletui a le Tofa Saili lea o loo faauluulu i le afioga i le Taitaifono, tofa ia Taefu Patea Pesamino Taefu, faapea foi le kalapu a le Fana Uma Pool Club.
Na faia foi le workshop e faamalamalama i tamaitai tauva le uiga tonu o le pageant ma talatalanoa i aiga ma a latou sponsors mo mea uma e ao ona silafia.
O le Aso Toonai sa faia ai a latou tapenapenaga mo le tauafiafi a tamaitai, lea na faia i le po o le Aso Toonai lava lea. Sa faia lava faapo fiafia ma faagasolo tamaitai e faamasani i luma o tagata ina ia aua ne‘i iai se fefe a o alo atu mo le tauvaga i le po ole Aso Toonai, aso 19 o Iulai.
Sa faataunuuina a latou faafiafiaga i lea afiafi ona alo foi lea i se taumafataga ma ta‘ape ai le aofia. O tausaga uma a o lumanai le tauvaga, e ao ona asiasi i se ekalesia e lolotu ai tamaitai i le Aso Sa, lea sa auai atu i le ekalesia a le susuga i le taitai aoao o le AOG Church of Samoa, Ps Taeauga Ropati & faletua ia Sāeseese Frost a o feagai ma le tuufaatasiga o le fale 10 a le Matagaluega.
O le vaiaso atoa e faagasolo ai a latou tafaoga, puega ata ma tapenapena uma a o alo atu mo le tauvaga i lo latou aso faapitoa e sailia ai se lalelei o Samoa i Ausetalia i le Aso Toonai 19 o Iulai 2014.
O le a faataunuu lenei tauvaga i le nofoaga o le Islamic College of Brisbane Hall, Tuatusi: 45 Acacia Road, Karawatha, Qld., i le itula e 4:00pm i le afiafi, ma e $80 le tau o le pepa ulufale mo le maimoaina o lenei tauvaga faatasi ai ma le taumafataga e maua.
Faatonu Miss Samoa Ausetalia: Talevu Koleta Galumalemana; Failutusi: Eugenia McFall; Aganuu: Patea Pesamino Taefu; Va i Fafo: Muliagatele Filipina Petelo; Sui o le Komiti: Tina Taefu, Sa‘u Matano ma le faletua ia Liz Kepu.
Suafa o tamaitai tauva
1) Tuutasi OAiga Jessica Taulaga
2) Tusipepa Sandra
Lilomaiava
3) Valasi Faataualofa Florida Charity Asiata
4) Mattia Saz Oti
