“Ua taofia ona pepa malaga ma tusifolau”… Komesina o leoleo
O se suesuega faalotoifale a leoleo i se mataupu sa tuuina atu i le fa’amasinoga ae na le mafai ona faaauau le su’esu’eina ona ose molimau autu sa tuua le atunuu ma malaga i fafo, ua taunuu ai i le faia oni moliaga faasolitulafono faasaga i le pelesetene o le Toomaga mo e puapuagatia, le faletua o Siliniu Lina Chang. O le aso Tofi na te’a nei na logoina ai e leoleo le pelesetene ma faailoa iai le taunuuga o le latou su’esu’ega. E fa moliaga o le taumafai e faalavelave i le sailiga o le amiotonu (interfere with justice) ua molia ai le tamaiti pelesetene. O se avanoa na fesiligia ai le Komesina o leoleo le susuga Egon Keil, poo a tonu mafuaaga o moliaga sa le mafai ona ia faailoa ona e lei maua sona silafia atoatoa.
O sailiiliga i le mafuaaga o le gaioiga ua faia nei e leoleo ua tau vavala mai ai i ni faamatalaga e faapea o moliaga nei e fesootai i se mataupu sa molia ai e leoleo se faletua o se faifeau i moliaga o le faaoolima i se teineitiiti ei lalo o le 16 tausaga le matua.
O se tasi o molimau a leoleo sa faamoemoe i ai le tagi a o lei oo i le faamasinoga na malaga ese ma le atunuu, ma o le mafuaaga lea o le suesuega faalotoifale a leoleo ma taunuu i le faia o moliaga faasaga i le peresetene o le Toomaga mo ē Puapuagatia.
O le saunoaga mai le Komesina o leoleo i le Aso Toonai na tea nei ina ua maua se fesootaiga ma lana afioga i le telefoni feaveai, na ia faamaonia mai ai e iai aiaiga a leoleo ua faia mo lē ua molia a o tālia le aso e tulai ai i le faamasinoga. “Ua taofia lona tusifolau ma ona pepa malaga uma”, o le saunoaga lea a le Komesina o Egon Keil. Na maua se feiloaiga faasamasamanoa ma le faletua o Siliniu Lina Chang i le faaiuga o le vaiaso ua mavae, ma ia faailoa ai i le tusitala moliaga ua faia ia te ia. O lana saunoaga mai o le a feiloai ma leoleo i le faamasinoga ma fofola ai ana mau e teena ai moliaga uma. Ua ia faailoa mai foi e ono taunuu le mataupu lenei i se isi tulaga pe a oo ina manino le mata o le vai ma faamamā lona suafa mai nei tuua‘iga uma ona e lē sa‘o. Ua silia nei i le sefulu tausaga talu ona faatuina le Toomaga mo ē Puapuagatia o loo fesoasoani i tamaitai ma tina ma fanau faapea soo se tagata i mafatiaga o loo sulufai atu ai i le faalapotopotoga.
O le aofaiga foi lea o tausaga talu ona avea Siliniu ma peresetene e oo mai lava i le taimi nei. O ia foi o se tasi na taulamua ma finau malosi mo le faatuina o le faalapotopotoga ina ua tele mataupu tau sauaga tau feusuaiga ua aafia ai tamaitai ma tina faapea fanau, ae sa faigata ona finauina nisi mataupu ona o faafitauli i le pitolaau a leoleo.
