Ua tulaga ese lenei tausaga i le Youth Alive i Samoa i le saoasaoa ma le televave o le poto ma le atamai o tupulaga talavou i le faatinoina o siva faaleagaga, e faaaogā ai pese mix ma taga eseese e faatino ai lenei tauvaga.
O lenei polokalame e faataunuuina i tausaga taitasi i luma o le Maota o le Malo, lea ua savali nei i le 17 tausaga talu ona faagasolo. Ma o lenei faamoemoe o loo tatala le avanoa i autalavou uma mai Ekalesia eseese i totonu o le atunuu i Samoa faapea ai ma atunuu i fafo.
O le tauvaga o lenei tausaga e 83 ausiva sa fai i ai le filifiliga, e 81 autalavou tauva mai Samoa ae filo ai ma ausiva e 2 mai i Wainiuomata i Niu Sila nei. E 3 vaega sa vaevaeina i ai lenei faamoemoe: Ausiva taitoa lua ma le toatolu; Ausiva toatele; Siva Faataupati, ma o le taimi muamua lea ua faatinoina ai lenei siva i le Youth Alive. O Me i lona aso 8 sa amata faatinoina ai lenei tauvaga seia oo i le aso 29, e fā vaiaso sa faia ai le vaega muamua lea sa amata mai i le motu i Savaii ae faaiu mai i Apia, ona totoe mai lea o ausiva e 44 lea sa faia ai loa le semi final i le aso 4 & 5 o Iuni i luma lava o le fale o le malo.
O le aso 9 ma le aso 10 o Iulai sa faataunuuina ai loa le suega siamupini i ausiva e 29 na sao mai i luga mai le semi final. O se vaaiga uigaese sa maitauina ai luma o le Maota o le Malo, i ekalesia ma afioaga taitasi aemaise o tagata mai atunuu i fafo sa molimauina ma tapuaia faiva a alo ma fanau i lenei tauvaga.
Ae o se itu na faateia ai foi le aumaimoa o le maualuga ua oo i ai le iloa ma le poto o tupulaga talavou i le faatinoina o le siva faataupati lea e faia i pese lotu sui fefiloi, ma o lenei polokalame o loo vaaia ai le gaioi pea o le Agaga o le Atua i le faaaogaina o alo ma fanau o Samoa i le taleni ma le meaalofa ua tuuina i ai e le Atua e ala i siva, aemaise ai o loo faatuputupulaia pea le alualu i luma o le tauvaga i tausaga taitasi, pe a faatusatusa i tausaga ua mavae lea e 80 ausiva sa auai i le 2014.
O vaega na silasila i ai faamasino ia lelei le valivaliina o le feau o loo momoli mai i le siva, o le togiga ma ia taga tutusa uma tagata. O le autalavou mai le EFKS mai Sapapalii na sola ma le $5,000 o le manumalo o le siva faataupati, o le autalavou mai le EFKS Saoluafata na pepese fiafia i le $10,000 o le ausiva toatele ma le tulaga muamua o ausiva taitoalua na suipi ai le Revival Brothers mai Tuanai i le $3,000.
O nei faailoga tupe uma o kamupani o loo latou lagolagoina lenei faamoemoe aemaise o le sponsor mautu o le Youth Alive le SIFA faatasi ai ma sailiga seleni a le komiti, auā o ausiva uma e leai se tupe e faaulu ai.
O se fiafiaga tele i le susuga i le Aposetolo ia Viliamu Mafoe faapea le susuga i le faafeagaiga ia Siagigi Vaafusuaga ma le vasega o le komiti faafoe o loo faatinoina lenei faamoemoe ona o le telē o le tāua ma le aogā o lenei polokalame i tausaga taitasi, ua lē gata ina faaolaina ai agaga o tagata mo le malo o le Atua, ae o se avanoa e maua ai e tupulaga talavou mai Ekalesia eseese le nofo fealofani, aemaise ai ua faailoa ma faaaogā ai le taleni mo le viiga o le Atua.
Faailoa e le susuga i le faafeagaiga ia Siagigi, e silia i le 3000 agaga sa faaolaina mai le amataina o le polokalame, ae faaiu le Youth Alive o lenei tausaga ua silia i le 7000 tagata ua talia le faaolataga, ua lē gata i tupulaga talavou ae o tamā ma tina o le atunuu faapea fanau aoga. E viia ai le Atua ma ua pepese fiafia ai foi agelu o le lagi i nei agaga ua liliu mo le Atua ma lona malo.
O le po la o le Aso Faraile ma le Aso Toonai ua mavae na faalauiloa aloaia ai loa le tatalaina o lenei DVD Youth Alive 2015 i totonu o laufanua o Aotearoa. O le Ekalesia o le Living Water Worship Centre Christian Church i Henderson sa faatunuuina ai lenei faamoemoe i le po o le Aso Faraile i le itu i Sisifo o Aukilani, ae o le ekalesia Samoa Worship Centre Christian Church Manukau sa tatala ai i le po o le Aso Toonai i le itu i Saute.
Na molimauina ai foi le lolofi atu o le mamalu o le atunuu i nei po e lua e faailoa lo latou lagolago i lenei faamoemoe e ala i le faatauina o le DVD, aemaise ai o autalavou sa faia a latou itema.
Ae o le maualuga ma le matagofie o lenei polokalame, ua faaolaina ai foi nisi o agaga mo le malo o le Atua, ua lē gata i tagata Samoa ae o tagata mai isi atunuu e pei o Maoli, auā o se feau tāua i ia po e lua, o le upu faauuina a le Atua na laugaina e le faafeagaiga ia Siagigi Vaafusuaga.
