Ole tamaitai o Josephine Mafoa, lea oloo avea ma sui o Samoa i lenei tausaga ile tauvaga ua faaigoaina ole Face of Beauty International, lea oloo faagasolo nei i Mongolia. O Josephine ole alo o Mulivai ma Fua Mafoa mai le alalafaga o Siumu ma Palauli Savaii, ua 26 nei ona tausaga ma oloo aumau o ia i Niu Sila nei ma faigaluega ile vaega o fefaatauaiga ale JA RUSSELLS.
Faapea mai Josephine, ose avanoa lelei lenei ua ia maua e faalauiloa atu ai Samoa ma lana aganuu i lea foi itu ole lalolagi. E to‘a 60 tamaitai mai isi atunuu ole lalolagi oloo tauva i lenei tauvaga e aofia ai ma Tonga ma Samoa.
Ma o nisi o iuga o vaega ole tauvaga ua mae‘a nei ona faia, lea sa aofia ai le taleni a Josephine ile tulaga 15 pito i luga (top 15). O lenei foi tauvaga sa aofia ai poloketi a tamaitai tauva sa faaigoaina ole “I AM ME” lea sa vaevaeina ai tamaitai ini vaega se 5, ma sa avea ai le tamaitai o Josephine ma taitai ole latou vaega.
Ae ole Poloketi ale tamaitai o Josephine lea sa faaigoaina ole “SAVE THE MAZAALI”, lea na sola ai le tamaitai o Josephine male tulaga muamua.
O nisi o vaega ole tauvaga e aofia ai faaaliga laei taele, laei faaleaganuu ma faatalanoaga taitoatasi. Ole taimi lona fā lenei ua faagasolo ai lenei tauvaga, ma ole tamaitai o Evelyn Vaigalu sa avea ma sui o Samoa ile tausaga 2014, male tamaitai o Tayla Scanlan ile tausaga 2015.
Ua mae‘a nei lenei tauvaga ile Aso Faraile na tea nei, ma sa manumalo ai le tausala mai Rusia ile aotelega ole tauvaga atoa.
E faamalo ai foi i lenei alo tamaitai o Samoa, ile tulaga mataina sa ia faatino ai lona auai atu i nei tauvaga tetele ale lalolagi.
