O le pale lona fā lea ua sauni atu nei i ai le tamaitai lalelei o Latafale Auvaa, e fai ai o ia ma sui o Samoa i le tauvaga e saili ai se lalelei o le lalolagi, le Miss World, e pei ona fuafuaina o le a faia le tauvaga i Sanya i Saina.
E tolu isi pale o loo tauave e Latafale i le taimi nei. Na amata atu i le pale o le Miss Samoa New Zealand, agai atu ai i Samoa ma ia manumaloina le pale o le Miss Samoa lea na avea ai ma sui o Samoa mo le sailia o se lalelei o Motu o le Pasefika, Miss Pacific Islands, lea foi na ia toe manumaloina ai lena pale, ma o loo ia tauaveina pea i le taimi nei.
Ae o lea la ua toe filifilia Latafale e fai ma sui o Samoa i le tauvaga lea mo le Miss World o le a faia i Saina i le masina o Tesema o le tausaga lenei 2015.
O le tauvaga o le Miss World o le tauvaga pito sili lenei ona leva faavaomalo mo le sailia o ni tamaitai lalelei o le lalolagi, e pei ona faavaeina mai i le tausaga e 1951. E silia ma le 120 atunuu o loo auai atu o latou tamaitai e tauva i lenei tauvaga, ma sa iai foi ni sui o Samoa sa tauva ai i tausaga ua mavae, peitai ua silia ma le 20 tausaga e lei toe auai atu se sui o Samoa, ae o le 2013 lea na toe auai ai loa le sui o Samoa, e pei ona tauva ai le tamaitai o Penina Maree Paeu.
O le auai atu o se sui o Samoa i lenei tauvaga tele a le lalolagi, o se avanoa lelei mo se tamaitai e lē gata ina militino faatasi ai ma le toatele o isi tamaitai tauva mai isi atunuu tetele o le lalolagi ma fefaasoaai ai tomai ma taleni faaalia, ae o se avanoa lelei o le a faalauiloa atu ai foi Samoa i le silia ma le piliona tagata o le a maimoaina lenei tauvaga.
O le tamaitai o Latafale ua 21 tausaga o lona soifua, ma e ulufale atu i ona tofiga faatausala o Samoa ma le Pasefika, o loo aoaoina i le Iunivesite o Otago i ana mataupu tau i le tulafono ma le musika.
O se tamaitai e faamanuiaina tele lona soifua talavou, e fai o ona foliga lalelei, o se tamaitai e atamai tau aoaoga, e talenia lona siufofoga i le itu tau musika, ae matuā talenia foi i taaloga e pei ona auai atu ai talu ai nei i le ‘aulakapi pa‘i a tamaitai Samoa lea na tauva i Taaloga a le Pasefika ma maua ai le pine siliva, faapea le ‘aulakapi pa‘i suifefiloi a alii ma tamaitai lea na manumalo i le pine auro.
Na maua se avanoa e fesiliga ai e le sui o le nusipepa le tamaitai faatonu o le Miss Samoa World, le Afioga Ulalemamae Te‘evā Matāfai, i sona finagalo i le tulaga o le a faagasolo ai lenei polokalame mo le sailia o se tamaitai e fai ma sui o Samoa i le tauvaga a le Miss World, ina ia faaauau ai pea lenei laasaga matagofie o le iai o se sui o Samoa e tauvaina lenei pale tāua.
Saunoa Ulalemamae, o le agaga lava lena o loo tulimataia, aemaise pe afai e galulue soosootau‘au ma le vaega o loo faafoeina le tauvaga mo le Miss Samoa. O loo faagasolo pea le talanoaina o lenei mataupu ma le vaega a le STA ina ia silasila ai poo le ā se faataatiaga lelei o le faagasologa o lenei polokalame i le lumanai, e pei ona iai le filifilia o le Miss Samoa o loo pale nei, na te tauvaina le Miss World nai lo le toe faia o se isi tauvaga e pei ona sa faia ai i le 2013.
Saunoa Ulalemamae, e fai si mamafa ma faigata aiaiga ma agavaa e tatau ona ausia e se tamaitai e filifilia mo le tauvaga o le Miss World, lona uiga e tāua tele mo le tamaitai o loo tauavea le pale o le Miss Samoa i lona vaitaimi, ona ia ausia foi agavaa e filifilia ai e fai ma sui o Samoa i le tauvaga o le Miss World.
Na saunoa foi Ulalemamae, e pei ona silafia o le tauvaga lava ia a le Miss World e fai i tausaga uma, ae mo le taimi nei, o loo tailua tausaga ma auina atu se tatou tamaitai tauva, ona e fuafua lava i le itu tau seleni. O le tāua lea o nei talanoaga o loo faagasolo, ina ia mafai ona saili se auala e gafatia ai le auina atu i tausaga taitasi o le tamaitai o le a avea ma Miss Samoa o lena tausaga, e tauvaina se tulaga o Samoa i le tauvaga o le Miss World.
Ua iai le fuafuaga o le Aso Faraile, 31 o Iulai, o le a faia ai se sauniga aloaia i le Le Vasa Resort i Upolu, mai le 1pm e oo i le 3pm, o le a auai atu ai le tamaitai sa avea ma Miss World Samoa 2013-2015, le tamaitai lalelei o Penina Maree Paeu, mo le faapaleina o Latafale i lea pale, auā lona faasauni atu ai mo le tauvaga i Saina i le masina o Tesema o le tausaga nei.
E momoli ai foi le faafetai ma le faamalo i le tamaitai faatonu o le Miss Samoa World, le Afioga Ulalemamae Te‘evā Matāfai, i le atunuu atoa aemaise i latou o loo lagolagoina pea lenei faamoemoe, faapea i tamaitai tauva o loo fai ma sui o le atunuu i nei tauvaga.
Alo ia i ou faiva Latafale Auvaa. O ou māmā na! Ia manuia au tapenaga uma mo le Miss World!
