“E tele taimi sa ou fesootai atu ai ile Samoa Rugby Union (SRU), peitai, e oo mai lava ile taimi nei e leai se tali maoti ua tuuina mai e faamanino ai mafuaaga ua tuli ese ai a‘u mai lo‘u tulaga ole Faiaoga ole Manu Samoa 7’s,” ole faaaliga manino lea a Damian McGrath e ala ise pepa o faamatalaga.
E tele faamatalaga eseese ua faasalalau faalauaitele ele SRU e faatatau ile faamaloloina o a‘u, e ui ina taumafai atu la‘u loia e taofia faamatalaga oloo faia pea ele SRU ua afaina ai lo‘u tauleleia, peitai oloo faaauau pea.
O nei taumafaiga uma ina ia faaleaga lo‘u tagata, e aunoa ma so‘u faasagatau atu iai, ua mafua ai ona ou manao oute tali atu i vaega ua tuua‘ia ai a‘u.
Oute fia iloa pe aisea lava ua faatutu tasi mai ai ia te au le iloiloga ale SRU auā e leai se iloiloga faapea na faia ile faiaoga lagolago faapea isi tagata sa matou galulue faatasi.
E pau le mafuaaga na faailoa mai ia te au ele CEO male taitaifono ole Board e faapea, ole faaiuga ua faia e faavae i luga o fautuaga sa tuuina mai ese komiti faapitoa sa iloiloina la‘u galuega.
O lea lipoti ua taulimaina e la‘u loia, e matuai feteenai mea oloo tusia ile lipoti male faaiuga ua fai ele SRU. Ole iloiloga e tusa ai male lipoti e pei ona ta‘ua, sa matuai lagolagoina ai le avea pea o a‘u ma Faiaoga Ulu ole Manu Samoa 7’s.
O nisi nei vaega na maua ile iloiloga, faatasi ai ma fautuaga oloo lomia ile lipoti ale Komiti sa faia le iloiloga o la‘u galuega.
ILOILOGA
E tusa ai o faamatalaga ma faamaumauga uma na tuuina mai ile Komiti mole Iloiloga ua matou tuuina atu ai le faaiuga ole matou Iloiloga:
Na faamalieina pe sili atu foi, le tulaga maualuga na faatino ai ele Faiaoga Ulu ale Manu Samoa Sevens, Damien McGrath lana galuega e tusa ai ma aiaiga o lana Konekarate male S.R.U.
Na mafai e Damien McGrath ona tauave lana galuega ole Faiaoga Ulu mole Manu Samoa Sevens, i lona tomai ma lona agavaa, ma lona naunautaiga ina ia ausia matatia sa faataoto, ole maua lea o manumalo i taamilosaga faavaomalo. Ole pine faamau, ole manumalo ole Manu Samoa Sevens ile taamilosaga taitoafitu i Paris.
Na manino lelei le agai i luma ole Manu Samoa 7’s e tusa ai ole faamoemoe maualuga ole SRU ina ia siitia le tulaga ole ‘au i faatulagana faavaomalo, e pei ona see mai ai nei ile tulaga 9 mai le tulaga 10 sa iai ile 2015.
Ole lē maua ose avanoa ole ‘au mole Olimipeka, e ui ina lē lelei mole ‘au faapea foi le atunuu, ae ose matatia e mafai ona tilotilo iai mole lumanai, pe afai e siitia tupe e tuuina atu mo tapenaga o vaega moomia mole faaleleia atili ole ‘au.
FAUTUAGA
O fautuaga nei na tuuina atu ele Komiti o Iloiloga:
1. Ia faaauau pea le Konekarate a Damien McGrath ole Faiaoga Ulu ole Manu Samoa Sevens, ma ia toe faia se isi iloiloga a‘o lei mae‘a lana Konekarate ia Aukuso 2017.
2. E tatau ona iai se fautuaga ale Faiaoga Ulu ile filifilia o tofiga nei mole taamilosaga 2016/2017
• Faiaoga Lagolago
• Taitai Malaga
• Physiotherapist
• Ma isi tagata latou te galulue faatasi (Staff)
I nei tofiga uma e talanoaina faatasi male Ofisa Sili, e tatau foi ona faatāua le filifilia o tagata oloo nonofo i Samoa mo nei tofiga.
3. O ni fuafuaga faataatitia fou ia ausia ai se tulaga maualuga KRA/KPI e tatau ona malilie faatasi iai le SRU male Faiaoga Ulu, a‘o lumanai le taamilosaga taitoafitu ole 2016/2017.
4. E viia le galuega a le Faiaoga Ulu ile atinaeina ole Manu Samoa Sevens oloo iai nei, ma ia unaia malosi le siitia o vaega taitasi uma mole alualu i luma ole ‘au ile isi 12 masina.
Ose otootoga lea ole Iloiloga oloo manino lelei le lagolagoina o a‘u e faaauau la‘u galuega, peitai oloo finau maumauai lava le taitaifono ole SRU, Tuilaepa Sailele Malielegaoi, ole mafuaaga tonu lea ua faamalolo ai a‘u ole Iloiloga, e aunoa male ta‘ua o tulaga lelei sa ou ausia a‘o o‘u galue ai mole SRU, sa tatau foi ona amanaia la‘u galuega ile atiaeina ole Manu Samoa Sevens.
Ose tasi o mafuaaga sa faailoa ele SRU ua mafua ai ona faamalolo a‘u, ole lē lelei o faaiuga o taaloga ale ‘au pe a faatusa malo i faia‘ina. Ile Kirisimasi ole 2015, e lona 12 Samoa ile faatulagaina o ‘au, pe a fua le aofaiga o malo i faia‘ina (win/loss ratio).
Ile faaiuga ole taamilosaga ile 2016, e lona fā Samoa i lea faatulagana, na‘o Fiti, Aferika i Saute ma Niu Sila, na sili atu ia Samoa, pe a faatusatusa taaloga na malo ai i taaloga na faia‘ina ai. O nei fuainumera sa ta‘ua foi i totonu ole Iloiloga sa faia i lo‘u tulaga ole Faiaoga Ulu.
Ua tolu tausaga e leai se malo o Samoa ise vae ole taamilosaga taitoafitu ale IRB. Ole manumalo ile taamilosaga i Paris Falani, na matuai viia lava ile lipoti ole Iloiloga, e maoae lea tulaga pe a manatu i lea taamilosaga, na malo ia Aferika i Saute ile semifinal, toe malo ia Fiti ile final, o ‘au aupito i malolosi nei ole taamilosaga.
Ole malo foi o Samoa ia Fiti i Paris, ole faatolu ai lea ona malo o Samoa ia Fiti ile taamilosaga ole 2016, ole faailoga lea o suiga lelei male agai i luma ole ‘au. Na malo foi le ‘au ia Aferika i Saute, Argentina, Niu Sila, Amerika ma Kenya o ‘au e valu pito i luga ole taamilosaga 2015-2016. Ole isi lea itu tāua tele sa viia ile lipoti ole Iloiloga.
Ole vaega mulimuli, ole lē mafai lea ona maua ose avanoa ole ‘au ile Olimipeka, ma ua ta‘ua soo foi lea tulaga. E leai foi se vaega o la‘u konekalate na faatulafono ai le tatau lea ona maua ose avanoa ole ‘au ile Olimipeka, e pau le taimi na ta‘ua ai le tulaga lea, ina ua faatulaga ponesi mo vae mulimuli e tolu o taamilosaga e sue avanoa ai mole Olimipeka.
Ana faapea e aiaia lea tulaga ile konekarate e tatau ona sao atu le ‘au ile Olimipeka, oute tautino atu, oute lē taliaina le konekarate. A tilotilo ile puupuu ole taimi, lē lava se tupe e faatino ai tapenaga, leai se fuafuaga mamao sa faataatia mai mole sailia ose avanoa ole ‘au mole Olimipeka, o lona uiga ole matuai faigata lava ona maua ose avanoa ole ‘au e tausinio ai ile Olimipeka.
Oute fia faailoa atu lo‘u agaga faafetai tele mo tama uma sa taaalo mole Manu Samoa 7’s, i la outou finau male loto atoa e tauave le igoa ole atunuu.
O lenei lipoti sa faaliliuina ile gagana Samoa mai le gagana Peretania, e pei ona tuuina mai ele alii faiaoga ua faamalolo. Ole faaiuga ole vaiaso na tea nei na tuua ai le atunuu ele alii faiaoga ma lona aiga ma lona faanaunauga e tumau pea le fia avea o ia ma faiaoga ole Manu Samoa 7’s. Na ia faailoa foi lona alofa tele ia Samoa ma lona fiafia e nofo i Samoa, na ia ta‘ua foi le agalelei o tagata Samoa ia te ia ma lona aiga, ose tulaga ole a lē galo ia te ia, i aso uma o lona olaga.
Ua mae‘a foi ona faamaonia mai e McGrath, ua tuuina atu ana tusi apalai mole avanoa faiaoga a Fiti ma Kanata, ae oloo tumau pea lona faanaunautaiga ia toe filifila o ia ma faiaoga ole Manu Samoa 7’s.
