E foliga mai e le o mautonu le faia i Niu Sila ole fusuaga a Laauli Joseph Parker ma Hughie Fury mo le aso 6 o Me. Oloo taumafai pea le vaega ma le pulega a Hughie Fury e toso atu i Peretania le fusuaga. O lipoti ia oloo maua mai i Peretania. Ae ole lave, ua leva ona faatauina i tua pepa ulufale ole fusuaga ile Vector Arena.

O tusitusiga maua mai, ua ta‘ua ai le musu o Hughie Fury e malaga mai i Niu Sila, ona ole mamao. Ae le gata i lea, oloo iai pea faaletonu ole malaga mai i Niu Sila o lona tamā o Peter Fury, o lana faiaoga foi lea, ona e le o talia e NZ lana apalai e malaga mai i totonu ole atunuu.

E mafua lea ona o Peter Fury, o ia ose tagata solitulafono tele i totonu o Peretania ile faatauina lea o fualaau faasāina. Na falepuipui o ia i Peretania mo tausaga e tele ona o ia soligatulafono.

Ua tulai mai ai nei le faaletonu, auā ua uma ona faamautuina le faia ai i Niu Sila ole fusuaga. Na faatonu ele WBO le faia ai ole faatautu‘i e saili ai poo fea ae pe o ai foi ole a tapenaina le fusugaga poo Duco Events le pulega a Laauli, poo Frank Warren le pulega a Hughie Fury.

Na manumalo ai Duco Events ile tauofoga lea ma see ai i NZ le fusuaga ina ua malo Duco. Ae e le o uma ai lava le taumafai pea o Frank Warren e toso atu i Peretania le fusuaga.

Fai mai ripoti oloo sailia e Frank Warren se vaega tupe e $5miliona Amerika e ave ile Duco Events, e faatau ai le fusuaga. Afai ae maua lea seleni, o lona uiga ole a ioe Duco Events e see atu i Peretania le fusuaga.

Ose popolega foi lea ia David Higgins, le pule o Duco Events. Na ia ta‘ua ile vaiaso na tea nei i lana malaga atu i Samoa, oloo taumafai le pulega a Hughie Fury e toso i tua le fusuaga. E le gata ile avatu i Peretania ole fusuaga, ae ole taumafai foi ole vaega e toso i tua le fusuaga ile masina o Iuni.

Faaalia ai le taumafai pea o Hughie Fury e faalavelave ile fusuaga. Auā ole aso 1 o Aperila lea na tuu iai le fusuaga, peitai, ina ua tuai ona saini  Frank Warren ma Peter Fury ile konekarate ina ua mae‘a le tauofoga, na mafua ai ona toe tolo ia Me le fusuaga. Ae o lea oloo taumafai pea le vaega e toe tuu atu foi i tua ia Iuni.

Afai e see i Peretania le fusuaga, ole a faailoga fesili ai foi le fesoasoani ale malo o Samoa lea ua ofoina atu mo Joseph Parker. Pe taunuu lea foai pe leai. E iai foi faaletonu, pe a lē taunuu le fusuaga a Parker ma Fury.

O lona uiga ole a toe saili e Duco Events se tasi e sui ia Hughie Fury. Ta‘ua e David Higgins, e le ose mea faigata lea tulaga. Auā oloo toatele tama fusu e fia fusu mo le fusi ale WBO oloo umia e Laauli. Ole uiga o nei mea uma, e matuā nunumi ia i tatou uma lava poo le ā le sa‘o. Ae o afea foi. A‘o ai foi. Ole a se‘i o tatou faatalitali pea.

A‘o loma le faamoemoe, poo fea e fai ai, ae ua amata ona felafoai upu ma tala ile lelei ma faaletonu ole fusu a Joseph Parker. E iai le vaega e le o iai so latou faamoemoe e manumalo Parker ia Fury. Ae toatele foi isi oloo talitonu e manumalo Joseph Parker ile fusuaga.

O ai lava e manumalo ae ole talosaga ale pulega a Anthony Joshua, ia manumalo Joseph Parker ile fusuaga lea. Ona ole manao o Anthony Joshua e fusu ma Joseph Parker. E maualuga atu le tulaga aloaia ose fusuaga e faia ile va o Parker ma Joshua, nai lo se fusuaga e faia ile va Joshua ma Hughie Fury.

Comments

comments