E silia i le valusefulu afe ($80,000) tala Samoa le tau na faatupe ai i se fesoasoani a le Malo Ausetalia e auala atu i le CCSP, o se faalapotopotoga tumaoti o loo nafa ma le faagaioia o talosaga mo atinae laiti, le galuega o se maota fou poo se multipurpose hall, e faatino ai aoaoga mo tupulaga o Tiavea Aleipata.
O aoaoga e agai i tomai e pei o le lalagaina o fala ma ietoga, aoao ai faiga ma auala mo le galueaina o faatoaga ma lafumanu auā o ni atinae lelei e manuia ai aiga ma le nuu aemaise o ekalesia.
Ua iai ma se vaega o lea maota e faia ai fesootaiga tau internet lea e mafai ai foi ona fesoasoani i fanau e saili ai mataupu mo a latou aoaoga. O le Komiti a Tina ma Tamaitai o Tiavea na taulamua ma amatamea i le sailia o se fesoasoani mo le faamoemoe.
Na tali mai ai le Malo Ausetalia i se foai e valusefulu afe, faaopoopo i ai ma le sao tau tupe o le komiti ma le nuu e $8,000. Faaalia e le afioga Tuiavii Fuimaono Poloma Eteuati, o le sa‘o o le afioaga o Tiavea, o se galuega lelei o le a tua i ai fanau ma tupulaga o le nuu i le itu tau aoaoga, ae o le a maua ai foi fesootaiga faaonaponei i le internet.
O le saunoaga a le tamaitai Hai Komesina o Ausetalia o Sue Langford na ia tautino ai o atinae laiti o loo fesoasoani ai lona Malo o le manulauti lea o le lagolagoina e Ausetalia o fuafuaga e faaitiitia le ola mativa o tagata.
Sa fesiligia le Hai Komesina e faalautele mai lona finagalo ae sa lē mafai. O lana talosaga e saili atu se avanoa o le tusitala i lona ofisa e faia ai se faatalanoaga aloaia ma o le a tulituliloa lea avanoa ona o le mataupu lenei i le faaitiitia o le mativa, o loo mau eseese ai tagata aemaise o lagona faaalia i le tulaga o le mativa i Samoa.
Faaalia e se sui o le CCSP le susuga Vaito‘a Toelupe, o atinae eseese e mafai ona aoaoina ai tupulaga o Tiavea o le sini autu lea o fuafuaga alualu mamao a le latou faalapotopotoga, le pogai foi lea na lagolago ai i le talosaga a le komiti o Tina ma Tamaitai o Tiavea mo se fale e faia ai lea faamoemoe tāua.
E fā afe ma ona tupu le aitalafu o loo totoe o le galuega, ma o le talosaga lea a le afioga Tuiavii i le tamaitai Hai Komesina pe maua se laveai o le nuu i le fesoasoani tuusa‘o a lona ofisa e totogi faauma ai le tau o le galuega. Na ona luelue i ai o le ao o le tamaitai o Sue Langford, ae o le a faatoa mautu se tali i le talosaga i se aso o lenei vaiaso.
