E lē mafai ona ‘alo Samoa ma suiga fou o fesootaiga ua liliu i ai atunuu o le lalolagi, e tusa lava pe taugata e tatau lava ona mulimuli ai. O le finagalo lea o le tamaitai pule sili o le Kamupani o faasalalauga tau televise ma leitio le Samoa Broadcasting Limited, le afioga Galumalemana Faiesea Matafeo.
O le tausaga fou ua faamoemoe le Malo o Samoa e suia ai fesootaiga faatekonolosi mai le tulaga o loo iai le analogue i le digital. O se suiga o le a faigofie ai le itu tau fesootaiga ma sili atu ona lelei.
Peitai ua faaalia e Galumalemana o lena lelei e mulimuli mai ai ma le fesili pe faamata e iai se fesoasoani a le Malo i le faatupeina o le suiga fou mo kamupani televise ma leitio auā a oo ina faatino o le a mafai loa ona maua fesootaiga tau leitio ma televise i auala televavave faatekonolosi e pei o telefoni feaveai ma masini komepiuta.
O le taugata o le faatupega e pei ona faaalia e le tamaitai pule sili, ona o masini fou uma e manaomia ae lē taugofie. Sa ia saunoa na pau i latou e sasaa i ai faamanuiaga o le suiga fou o kamupani ma pisinisi tau fesootaiga auā o le a alumia ai a latou oloa tau fesootaiga, ae mo Samoa o se atunuu tau atiae o le a lē gafatia e le toatele o tagata le totogi e maua ai lea suiga.
O le vaiaso ua mavae sa usuia ai i Samoa le fonotaga a sui o fale faasalalau o televise ma leitio ma fesootaiga i luga o upega tafailagi a atunuu o le Pasefika ma Asia. Sa talanoaina ai le mataupu i tapenaga a kamupani mo lea suiga fou o fesootaiga tau faasalalauga e faaaogā ai le digital.
Na faaalia e Galumalemana Faiesea o se fono sa tumutumu mai i ai sui o kamupani eseese mai fafo e mafua ona o le faalauiloaina o a latou auaunaga e mafai ona maua ai masini ma isi tautua, ae peitai e leai se kamupani o fuafua e faapa‘ū le tau o a latou oloa ma auaunaga ina ia gafatia e atunuu laiti e vaivai le tamaoaiga o a latou faiga faapisinisi.
O le afioga i le Palemia susuga Tuilaepa Lupesoliai Sailele Malielegaoi, na tatalaina le fono lea sa ia faailoa lona naunau e fia maua se lipoti o le taunuuga o le fonotaga, ona o se isi lea o tapenaga a le Malo o loo faatino i le taimi nei mo le suiga fou o fesootaiga i le atunuu.
Pe afai e faatino lenei suiga i Samoa o le a lē toe vaaia loa ni televise e faaaogā i ai le analogue ae o le a na o televise e alu i le digital. O lona uiga o flat screen TV o le a aumai e faatau i le atunuu, lea ua molimauina le taugata tele o ia ituaiga i Samoa.
O le initaneti o le a mafai ai ona faaoo le tautua a fale televise i nuu ma afioaga o loo faaletonu ai pou faasalalau, peitai o le mea mautinoa o loo taugata le totogi o le initaneti i Samoa, ma o se isi lea itu o loo silasila i ai le Malo i le mafai ona faataugofie ina ia maua e tagata uma soo se fesootaiga digital.
