“..Avele, ua mafua ona mafai ona tatou faataunuuina mea uma, ona sa faaloaloa le Aao o le Atua ia te i tatou…”
E ui ina ua tau masina ua tuanai ai le faamoemoe o le faailogaina o le 90 tausaga talu ona faavaeina le Kolisi o Avele i Samoa, ae na lē mafai ona aveesea ai le agaga o le faafetai ma le faamalo o le Asosi o Tama ma Teine Tuai o Avele i Aukilani i so latou agaga tausinio ina ua maualuga so latou taumafai e lagolago ma soosoo tau‘au atu i Samoa i tapenaga ma sauniga uma sa fai.
Saunoa le susuga i le Peresetene o le ACOPA i Aukilani, le susuga ia Vaniah Toloa, “E lē mafai ona tuueseina se agaga o le fiafia ma le fia faafetai i sui taitasi uma o le Asosi….” Mai lea saunoaga, sa faamauina mai i totonu o le fale kalapu o le Old RSA Club i Otahuhu, sa faia ai se fiafia tele, o se faatasiga na faaigoaina THE ACOPA CELEBRATION DINNER OF THE 90th ANNIVERSARY OF AVELE COLLEGE IN AUCKLAND.
Na ta‘ua e Vaniah, “..o lea faamoemoe, o se fiafia e faailoa ai le agaga faafetai atu o le Asosi o Avele i Aukilani i le Atua, e faafetai atu ai foi i aiga, o uo ma paaga masani o le mafutaga i Aukilani, o ē sa lagolago malosi ma tapuaia lo matou alo atu e tausaili se seleni mo Samoa ma tapenaga uma o le 90 tausaga….”
E foliga mai e lē faapa‘ole pe faatamala le faatinoina o lea faamoemoe e tusa ai ma ana saunoaga, ae ina ua toe tulituliloa lana tala muamua, “…ioe, e ui ina lagona le manatu faatauvaa i lo‘u nei tagata i le Taitaiina o le mafutaga, ae lagona le lototele ona o le faamalosi mai o le Agaga o le Atua, ae maise o nisi o Tamā matutua o le mafutaga, o uso ma tuafāfine i le taumafaiga o tapenaga uma o le 90 tausaga o Avele…”
E matautia foi le vaaiga sa iloa ma molimauina i le po o le Aso Toonai na tea nei, 9 Aukuso 2014, o se fiafia mataina lona faapolokalameina auā e lē gata i le toatele o Sui o le mafutaga, ae na molimauina e nisi o aiga, uo ma ē masani sa mafai ona auai atu i ai.
E lē natia se tala aave na faasalalauina e Nusipepa, Leitio ma TV mai Samoa i le faamanatuina o le 90 tausaga o le Kolisi o Avele i le masina o Iuni na tea nei, e lē tau natia foi le auai atu o le mafutaga lenei a Aukilani ma ona tala aave mai ia latou tapenaga ma so latou sao sa tuuina i le Komiti o tapenag o le 90 tausaga.
Na toe faaopoopo le Peresitene, “…e lē o se mea e mitamita ai se tagata, ae faafetaia le Atua ona o le agaga galulue i sui o le mafutaga ua mafai ai ona faataunuuina mea uma na tutupu e pei ona molimauina..”
E iai tufaga faailoga sa faia i lea po (Prize Giving) “…e sa‘o lelei, tasi lea tulaga sa tagai i ai le Laulau, e faailoa atu ai i sui o mafutaga, lo matou amanaiaina o i latou i le loto e tasi ma le galulue fiafia, ua na ona ni faailoga (trophies) e tuuina atu i sui na iloga lo latou tulai mai i le taumafaiga ma le faamaopoopoina o le Mafutaga mai le amataga seia faaiuina lenei faamoemoe…”
E tele polokalame matagofie na feilafi ai le fiafia a le ACOPA Aukilani i lea po ma sa faaiuina i le manuia. Na tomua le po fiafia i se faigalotu, na saunia e Pastor Charlie Reeds, o se tasi foi o Sui o le mafutaga o loo avea ma faifeau o le Ekalesia AOG.
Ina ua faaiu se talanoaga ma Vaniah, “….ua mae‘a nei lea vaega o faamoemoega tāua o le Mafutaga a Aukilani mo le 90 tausaga, ma ua faaiu ai foi ma so matou auaunaga o i matou o loo umia tofiga i luga o le Laulau, o tofiga uma foi nei o le Peresetene o loo ou umiaina, o le Taitaifono le susuga ia Fata Reupena Faavaoga, le Failautusi le tamaitai ia Emma Ioka Masoe ma le Teutupe le susuga ia Faamoana Monty Vili. O le a toe tuuina uma i luma o le Fonotaga a le Asosi ia Setema o le tausaga nei, e toe filifilia ai se Laulau fou e faaauauina le Mafutaga mo le lumanai.”
Na momoli le faafetai ma le faamalo a le Peresetene i le Paia ma le Mamalu o Samoa i Aukilani ma soo se vaega o le lalolagi sa velo ‘aso ma togi so latou maa auā sailigatupe uma sa faia. Fai mai le faamalosi a le Taitai i le faigalotu i lea po, “..Avele, ua mafua ona mafai ona tatou faataunuuina mea uma, ona sa faaloaloa le Aao o le Atua ia te i tatou.”
