Ua taoto nei i finagalo ma loto o le mamalu o le atunuu le iuga ua oo i ai le ata tifaga ua faaigoaina o le Toe Foi Tama Savaii. Auā o se tasi nei o ata o loo tele ina ma‘i valea ai le isi loomatua ma le isi toeaina pe a tuai ona sosoo mai le isi vaega o le ata. Aemaise ai lava o le mālie o faaupuga ma le mananao o le aumatamata e tulituli le au o le paipa poo ai o le a faaipoipo i ai Vili.
O le taeao o le Aso Toonai na alu soli ai le mamalu o le atunuu i totonu o le taulaga faatau i Magele e maimoa ma molimau le tatalaina o le Vaega 4 o le Toe Foi le Tama Savaii, ma o le faamae‘aina ai foi lea o lenei ata tifaga o loo tele ina fiafia i ai le atunuu.
O le mālie o pesega ma faafiafiaga na taofia uma ai le mamalu o le atunuu mai ia latou faatauga, aemaise ai lava o nai tamā ma tina matutua sa maua lea avanoa e ‘ata ai ma sui ai foi le isi siosiomaga nai lo le nonofo i le fale. O le aso foi lea na toe maimoa ai le atunuu i tama tuai o le Tiamaa le susuga ia Pagamalie Iopu Faivalu ma le susuga ia Vili Ieru, o le tele o pese tuai na toe usuina e nei tamalii o le atunuu faatasi ai ma le leo tagitagi o le alii o Mautoatasi Asuao na ia usuina le pese o le Toe Foi Tama Savaii o loo autu ai lenei ata tifaga.
O le fofoga o le aso o le afioga ia Papalii Lafulafu Peo, ae o le susuga ia Lale Talo ma le faaili o le Pacific Love na faafiafiaina le mamalu o le atunu. Na silamio le au maimoa ina ua toe faalogoina foi le tatagi o ususu a le ausiva a le Tatau Dance Crew lea o loo tele ina fiafia i ai le atunuu i ana faafiafiaga.
Na maua foi le avanoa e tufa ai lole mo nai fanau aemaise o ata na fai ai faailoga mo le aumaimoa i taaloga sa faatinoina ai. O se tasi o faili o le Qsoul ua iloga foi lana tautua i le atunuu i musika, na latou peseina nisi o pese o loo faatinoina mai ai nisi vaega o le ata. Sa faatauina foi le vaega 1 ma le 2 o le ata i lea aso i le $20 ae o le ata fou e $35 faatasi ai ma le CD fou a le susuga ia Pauga Ta‘i Logoipule ma le Qsoul i lana CD Kirisimasi na faatauina foi i le $20. Ua tele ina faatau nei i faleoloa masani lenei ata auā lava le maimoa a le atunuu, ae o le Aso Lua 16 o Tesema o le a faatauina ai loa i Sini i Ausetalia.
