O le Aso Faraile ua mavae na agiga ai i luga o le upega tafailagi poo le website a le Pacific Business Trust, o loo faamatala mai ai ni suiga o le a iai le Pacific Business Trust, ma ua iai foi ma le faamaninoga o le a tapuni le ofisa o loo i Kalaiesetete, ma o le a iai ma nisi o le aufaigaluega o le a vāea.
Ua atagia mai foi i lea faaupuga o le a faatau ese atu aseta a lea Trust o loo i le magatolu i Otahuhu le fale ma le fanua o loo iai.
O le Pacific Business Trust o nisi ia mea sa finau i ai le tatou komuniti i le vaitaimi o David Lange, ma faamatuu mai ai le tupe e fesoasoani i tagata ua leai ni galuega ae mananao e atinae a latou pisinisi. O le seleni lea sa mafai ona aitalafu e tagata fai taxi ma amata ai a latou pisinisi. Ma e foliga mai o le a faatau ese atu nei aseta e aunoa ma se malamalama o tagata lautele poo le ā le mea o le a fai i ai.
Ae na fesiligia e le afioga i le Faipule o Magele le tofa ia Su‘a William Sio, le CEO ia Rob Meru i le tulaga o le a faatau ese ai nei aseta, ae lē o manino mai se tali a le CEO, ma ua fesiligia foi e Su‘a le minisita o tagata atumotu le afioga ia Peseta Sam Lotu Iiga, auā o lana lea matafaioi o le filifilia o le Board o lenei Trust.
E tatau ona faamanino mai, poo se latou fuafuaga o le faatau ese atu o meatotino poo aseta a le Trust. Ae lē gata i lea e tatau i le Minisita ona faamanino lelei mai pe iai se lumanai o le Pacific Business Trust pe leai.
O loo faamanatu foi e le afioga i le faipule ia Su‘a i le minisita ma le latou Board o nei aseta o meatotino a le atunuu.
O loo finauina pea e Su‘a lea mataupu ma fesiligia pea le minisita pe fia se tupe o le a toe faatau atu ai nei meatotino, auā o lona talitonuga e silia ma le 3 miliona le tau poo value o nei aseta ma ia fesili foi poo fea o le a ave i ai.
O le a faatalia pea la se isi toe faaopoopoga o lenei mataupu pe a maua nisi feiloaiga ma i latou tonu o loo fitoitonu i ai lenei faalapotopotoga ma faia faaiuga i lenei suiga o le a iai.
