Ua leva ona faalogologo ma faafofoga le atunuu i luga o alaleo ma upega taifailagi i le siufofoga o le alii pese o Polu Paletaoga, ae paga lea e lei mafai ona vaai tino iai pe faatalofa foi iai nisi o le mamalu o le atunuu aemaise lava i nai tina ma tama matutua o loo nonofo i maota ma laoa, i lea alo o le atunuu ua iloga lona sao i le malie o ana musika.
I le malaga taamilo mai ai la o le afioga ia Aiolupotea Polu Paletaoga ma le faili a le Nifoloa i Aotearoa nei na maitauina ai i le faaiuga o le vaiaso i le aso Faraile ma le Aso Toonai i totonu o le fale faafiafia o le Parataiso i Otara le faatumulia o le atunuu na agai atu ma molimauina le tatala aloaiaina o le CD Vol 22 a le afioga ia Aiolupotea Polu Paletaoga ma le Le Nifoloa.
O le po o le Aso Faraile pei sa faapitoa lava lea i tama ma tina matutua i le fiafia ina ua feiloai ma faatalofa ma le afioga ia Aiolupo aemaise ai o se avanoa ua faafofoga lelei ai i lea tamalii ao ia usuina le tele o ana fatuga Samoa.
O le fiafiaga i tuaa sinasina ua mafai ona feiloai atu ia Polu aua na ona faafofoga lava i pese ae lei mafai ona faatalofa pe vaai iai. Ua taunuu ai upu ua talitonu Toma inau a vaai ma pai iai i tama mai Salafai.
O le Aso Toonai na le faavaivai ai lava le tupulaga aemaise o aiga ma uo o le susuga ia Polu i le faatasi atu ma lagolagoina lona faamoemoe, sa malaga mai nisi o ona aiga ma uo mai Ausetalia ae faapea foi i nisi o uo o loo galulue i le leitio o le Saaafi i Amerika lea foi sa faatasi mai. O le susuga ia Asiata Pio Vaoliko sa fai ma fofoga o le po i nei aso e lua.
Na faailoa le agaga fiafia ma le agaga faafetai o le susuga ia Aiolupotea Polu Paletaoga, i le paia ma le mamalu o le atunuu sa auai atu ma apogi le tatalaina o lana CD. Ua faailoa le alofa tulai o le atunuu aemaise o le titifaitama o matua lea sa vaaia ai le faamaloulou atu I nei po e lua.
O le tausaga 2006 na amata mai ai le tautua pese a le afioga ia Aiolupotea Polu Paletaoga ma ua 22 ai nei o cd ua mafai ona ia tuufaatasia.
O le tele o pese Samoa sa ia tusia ma fatuina sa fatu mai lava i mea sa tutupu i totonu o aiga ma nuu, i le mea sa galue ai i le fatuaiga tausi.
O le aoga foi o nei pese e fesoasaoni ai i tupulaga Samoa sa fananau i atunuu i fafo ae o loo mafai ona momoli mai ai le taua o Samoa ma lona tala faasolopito. O le pese Puleono i Salafai, e tasi le fuaiupu na iloaina, ae ina ua ia toe sailiili i le uiga ma le taua o le pese ma o lea toe suesue atili ai i le talaaga o Salafai ma ia fatuina ai loa le pese.
O le susuga ia Asiata Pio Vaoliko faapea le tamaitai ia Ana sa galulue faatasi i le taumafaiga o lenei faamoemoe aua le unaia lava o le taleni ma le meaalofa pese ua maua e nei alo o le atunuu.
O le afioga i le aloalii ia Galumalemana Tai Galumalemana sa ia lagolagoina lenei faamoemoe.
