O le au a le Nations, o se tasi lea o au na faafaigata i le taamilosaga a le Aukilani Samoa i le tausaga ua mavae, ma sa iu ai lava ina oo i le suega siamupini ma le au a le Maroon mai le afioga o Apia, ma manumalo ai. Ua toe sauni atu nei foi e toe puipui le latou siamupini mo lenei tausaga. O alo ma fanau o loo nonofo i le itu i Sisifo o Aukilani o loo latou faia lenei au aemaise lava le pitonuu o Avondale.
O le afiafi o le Aso Faraile, 22 o Aukuso na faia ai se sauniga faapitoa i le maota o le Nafanua i Avondale e tatala aloaia ai le isi a latou togiga e koleni ai ae lei oo i le taimi e faatino ai le taaloga.
O le susuga i le a‘oa‘o ia Tavai Meni na ia taitaia lea sauniga, ma sa faamalosi ai le a‘oa‘o i le tagata e sili ona leoleo i lona loto e tupu mai ai le amio. E maua malo i le amiolelei ma le pulea lelei o le loto i totonu o taaloga. Auā o taaloga o loo iai le fili na te faatupuina maseiga ma misa.
Na auai uma nisi o mātua o loo latou lagolagoina lenei aulakapi faapea le pulega. O le susuga i le faiaoga o le au ia Solo Afioga sa fai ma fofoga o le po. Sa faapea foi ona momoli faamanuiaga a le faatina ia Miriama Siitia i le au, ma le saunoaga a le tamā matua ia Faumui.
O le peresetene ia Toleafoa Siu sa fai ma sui o le au e momoli le faamalo ia i latou sa auai atu ma opogi le faamoemoe. Na faaiu le po i le itu na saunia e alo ma tamafanau o loo taaalo i le Nations.
O le kamupani a le Money Shop o loo latou lagolagoina lenei au, na latou foaina le 23 ofuvae (shorts) ae 50 mitiafu koleni, ma e $2,500.00 na faatupeina ai lenei togiga. O le pulega o le au o le peresetene o le susuga ia Toleafoa Siu, o lona sui o Su‘a Afa Wong Lee, o le taitai o le au o le susuga ia Polevia ma lona sui o Laki Tasele.
O le Faiaoga o Solo Afioga ma le Sui faiaoga o Vaai Ioane. O loo iai foi nisi o kamupani o loo latou lagolagoina lenei au e pei o le My Samoa Takeaway, Fiafia Night Club ma le Fale Oti Ulu o George.
