O upu ale atunuu “E feleleai lava le manulele ole toloa ile atulasi ole lalolagi, ae e iai lava taimi e toe maau ma malolo i lona siosiomaga Masani.”
E ui lava foi ina ua motu mai ma le taula, e sailimalo ma saili ni lumanai manuia i atunuu i fafo, ae oloo manatua pea le faasinomaga o Samoa auuliuli lava.
E lē gata ole gagana, ae o tu ma masani aemaise ole soifuaga i aso fai soo.
Oloo soifua lava faa-Samoa, ua tutupu ane foi alo ma fanau maua le poto ma le atamai ma maupaolo atu nisi i tagatānuu o nisi atunuu, ae e malosi lava lagona i taiala sa fatonutonu folau ai olaga e tuaa ma mātua ile faa-Samoa.
I lo matou nonofo ai ma nopiai ile aai o Melepone, oloo maitauina pea le faatupulaia ole toatele ole paia lasilasi o nai o tatou tagata oloo naunau e faalauiloa le igoa pele o Samoa i sailiga malo faapisinisi.
O nai vaiaso na tuanai atu na tatala aloaia ai se auaunaga fou faapisinisi i lo matou aai, ua avea nei ma faamāmā avega ile lafoina o atigipusa lafo faamomoli mo Samoa.
Ole itu mataina ile auaunaga lenei ona ole laiti o soifua o si ulugalii ua faatamo‘eina.
Ole metotia foi ua amataina ai le faamoemoe ose fuafuaga mautu, e ala lea ile faipaaga ma nisi faipisinisi mai Filipaina ua iloga la latou tautua i Melepone, e pei ona sa latou malaga uma ma ulugalii Filipaina e toalua i Samoa se‘i silasila ma faalauiloa iai si o tatou atunuu, ma fai foi feutagaiga ma nisi o faipisinisi i Samoa, lea ua amataina la latou faigapaaga. Ole tautua lenei ua faaigoaina ole AUPHISA, poo le Ausetalia, Philipino Samoa, oloo faafoeina ele susuga ia Ben ma lona faletua ia Pepe Ah Mann.
`Na mataina le tatalaina aloaia ole faamoemoe ile Grande Reception i Epping, ile mamalu ma le paia lasilasi o Samoa na afifio atu e opogi, ma maimoa foi i faafiafiaga faa-Samoa lea na matuā mataina ile silasila a tagatānuu Filipaina aemaise o papalagi Ausetalia.
