Ua faaopoopoina aulotu ole galuega ale Atua i totonu ole ekalesia Nasareta Samoa i Aukilani, e pei ona tatala aloaia ai le isi ona aulotu fou i Panmure ile taeao ole Aso Sa ua mavae 4 o Mati. Ole naunautaiga ole lotu poo le manulauti oloo tatai iai lagona ole aufaigaluega ale Atua poo susuga i faafeagaiga, ia faasooina pea le tala lelei ale Atua ina ia fai nuu uma lava ma soo ile tele o agaga oloo fia maua se fesoasoani ma galala ile upu ale Alii.
Ole lotu muamua lea ale Nasareta Samoa ua faatūina i lea itu o Aukilani, ma le talitonuga ma le silasila mamao o susuga i faafeagaiga, e tasi lava le mafuaaga ua faatuina ai le lotu i totonu o lea pitonuu, ona e iai tagata manunu’a oloo tausaili ni Samaria agalelei e alolofa faamaoni iai e ala ile ola faaleagaga, e pei ona faamamafa ile faamalosi ale susuga ile ta’ita’i aoao ole ekalesia Nasareta Samoa le susuga ile faafeagaiga ia Joshua Filipo Lesatele.
Ole aloaiaina ole tatalaina ole galuega ale Atua i Panmure na tumutumu ai susuga i faafeagaiga mai isi aulotu ale Nasareta i Aukilani faapea aiga uo ma ē masani, na molimauina le lelei ole Atua i totonu o lana galuega.
O foliga ole fiafia ma le loto faafetai o tagata uma ile Atua na alalaga ai lana fanau e siitia lona viiga, i totonu ole hall i Panmure, auā ua taulau ole faamoemoe na nofo tatalo ma anapogi ai lana fanau.
Ole susuga ile ta’ita’i aoao ole ekalesia Nasareta Samoa le faafeagaiga ia Joshua Filipo Lesatele na manavaina le upu folafola ale Atua e faamalosi au ai ile susuga ile faafeagaiga ia Fineaso Faavae ma lona faletua ia Tausaga Faavae lea ua tausia le aulotu fou i Panmure.
Ua sefululima ai nei aulotu Nasareta Samoa i totonu o Niu Sila lea e aofia ai ma aulotu e lua oloo i Ueligitone.
E sefulua matafale ua galulue faatasi nei ma le susuga ile faafeagaiga ia Fineaso Faavae e amata ai le lotu, ma le talitonuga ole susuga ile faafeagaiga ma lona faletua e iai foi isi agaga ua saunia ele Atua mo lana galuega i lea itu ole tovine, ae faavae nei mea uma ile faalagolago ile agaga Paia ole Atua.
Ole susuga ile faafeagaiga ia Fineaso Faavae ma lona faletua ia Tausaga Faavae ua leva ona galulue ile galuega ale Atua i Samoa a’o lei malaga mai i Niu Sila nei. E tolu ma le ‘afa tausaga sa tausiaina ai le aulotu Nasareta i Neiafu i Savaii, ona siitia mai lea ma galulue i Matautu i Lefaga ile sefulu lua tausaga, ina ua mae’a lena ona toe galulue lea ile vaaiga ole Aoga Aso Sa ale ekalesia i Ululoloa seia oo lava ina faamanuia le Atua ile aiga e ala ile quota ile tausaga e 2006 ma malaga mai loa i Niu Sila nei.
Sa faaauauina le soifua galulue ile lotu Nasareta i Magele ile susuga ile faafeagaiga ia Tauilo Vaotuua ma le faletua, ile fā tausaga. E lua tausaga sa malaga ai i Ausetalia i Sini e sailiili matagi auā lava se manuia ole aiga ma le fanau, ona toe taliu mai lea i Aukilani ile tausaga ua mavae 2017, ma lolotu ai i Takanini i lalo ole ta’ita’iga ale susuga ile ta’ita’i aoao ole ekalesia ia Joshua Filipo Lesatele ma le faletua ia Leitu, seia oo lava ina valaauina e galulue e tausi le tovine fou i Panmure.
Saunoa le susuga ile faafeagaiga ma le faletua i lo laua agaga fiafia ma le loto faafetai ile Atua ona o avanoa oloo tatala ma tuuina mai ele ekalesia e faaauauina ai lo laua valaauina. E lē faia foi le laua galuega e faamoemoe ile malosi ma le poto faaletagata ae faalagolago mea uma ile agaga Paia ole Atua e manuia ai mea uma.
