O le faamanatuina o le aso mo fitafita o taua lea ua ta‘ua o le ANZAC Day ua toe talosagaina ai i Samoa nei e le Peresetene o le Asosi o Fitafita toe taliu mai i taua le toe faafoi o le aso malolo mo lea aso faamanatu faapitoa.
O lea ua silia ma le lima tausaga talu ona lē toe faamanatuina se aso malolo o le aso o le ANZAC i Samoa ona o le tau feutagaiga o aso malolo a le atunuu pe tumau ai le aso malolo mo fitafita o taua pe ave le aso malolo i le Aso o Tamā o le atunuu.
O lea la na faatino ai loa le aso malolo mo le Aso o Tamā ona o finauga foi na laga o le fai o le aso malolo mo Tina ae e leai se aso malolo mo Tamā. O le faafitauli na tulai mai i lea taimi ona o le manatu o le malo e tatau ona faaitiitia aso malolo ua iai a Samoa i le tausaga. Ae talu ona lē toe faamanatuina le aso malolo mo le ANZAC e lei malolo lava foi le talosaga o faauluuluga o le Asosi o le RSA mo le malo e toe silasila e faafoi le Aso Malolo i le aso o le ANZAC ona o le faatāua e tatau lava ona ave i alo o le atunuu ua afu foi le tautua auā le puipuiga o le filemu e lē gata i soo se itu o le lalolagi ae o le vaega foi o leoleo o loo tausia pea le puipuiga o le atunuu atoa.
E pei lava ona silafia o le aso 25 o Aperila ua faamanatuina i Niu Sila, Ausetalia ma vaega o le Pasefika faapea ai Europa o le aso na maliliu ai le toatele o fitafita Ausetalia ma Niu Sila na malaga atu i se osofaiga i le aai o Gallipoli i Take peitai o se osofaiga na iu leaga i le maliliu ai o le toatele o ia fitafita.
O le toatele o fitafita Samoa na iai i lea taua, na tau i lalo o le vaegaau a Niu Sila i le vaega o tagata Maori ma o se aso ua faamanatu ai foi i Samoa le soifua tautua i taua eseese o le lalolagi mulimuli mai.
E oo lava ia i latou ua tautua i soo se vaegaau i fafo, ua manatua uma i lenei aso faapitoa. Mo Samoa o le sauniga na faia i lalo o le uati, le maa faamanatu o le Taua Muamua o le Lalolagi ma o iina na tumutumu ai foi i latou uma o sui o le RSA le asosi o fitafita o taua, e lē gata i lea o sui o fitafita i fafo o loo galulue i le taimi lenei e pei o i latou mai i le malo o Niu Sila ma Ausetalia o loo galulue mo le saogalemu o ogasami o Samoa atoa ai le Ofisa o Leoleo.
E lē gata i lea o aoga ma i latou o tausi soifua ma sui o le malo o Samoa auā le manatua ai o i latou uma o le atunuu na ave o latou soifua e tautua mo le puipuiga lautele o le lalolagi.
O le mae‘a o le savali mai i le uati i le pito i gauta ane o le Eleele Fou o loo iai le isi faamanatu o le taua lava lea, na agai ane ai loa i latou na i lea sauniga o le vaveao i le fale o le RSA i Apia lava mo le sauniga faapitoa o le aso e pei ona avea ai le afioga Lautafi Selafi Purcell ma sui o le malo e toe ave le faafetai a Samoa atoa ia i latou o le atunuu ua tau i taua ma galulue i vaega o le puipuiga i soo se itu o le Pasefika ma le lalolagi i lo latou sao ua faapea ona faia. O le taimi lenei e to‘a 60 sui o le RSA o loo lesitala i le taimi lenei.
O lona fale lea e ta‘ua lava o le RSA i le ogatotonu o le taulaga o Apia ma o le malo o Niu Sila, i lona Hai-Komesina o Jackie Frizelle.
O le mae‘a o le taua muamua o le lalolagi, e to‘a 60 afe fitafita Ausetalia na maliliu i le taua lea, ae to‘a 18 afe fitafita a le malo Niu Sila.
