Ua teena le talosaga a le itu a Faifeau Toeaiina o le Ekalesia Faapotopotoga Kerisiano Samoa, sa tatalo ai i le faamasinoga maualuga e faamuta ma taofi le tagi a le susuga i le Faifeau Toeaina o le Matagaluega a Kuiniselani le susuga Kerita Reupena faasaga i le faaiuga a le Komiti Faatonu ma le Komiti a le Au Toeaina na aveesea ai ona tofi o le Toeaina Faatonu ma le Toeaina o lana pulega.
Peitai ua talia e le faamasinoga le talosaga a faifeau Toeaina o le ekalesia, e taofi le faaauauina o le talosaga a Kerita Reupena o loo tulai ai le tamaitai loia le afioga Leulua‘ialii Olinda Woodroffe, ina ia su le Ekalesia Faapotopotoga Kerisiano Samoa.
Ua manino mai i le faaiuga lenei o le a faaauauina le faamasinoga i le talosaga a le susuga Kerita, ua lē talafeagai le faaiuga na faia ua aveesea ai ona tofi ona ua aafia ai ana aiā tatau faavae faaletulafono.
O le mafuaaga lea o se tasi o vaega o le faaiuga ua aumai, ina ia tuuina atu se talosaga tali a le itu a Toeaina o le ekalesia ua faasagasaga taitoatasi i ai le mataupu, e tali ai i le talosaga autu a le itu tagi. O le aso 3 o Iuni ua faatonuina e le faamasinoga e tatau ona faila atu ai lea talosaga tali a le itu tetee.
O le faaauauina o le tofi Toeaina Faatonu ma le Toeaina o le pulega a le Susuga Kerita Reupena, ua faaalia e lana loia ua toe faatumauina e tusa o le faaiuga ua aumai ua faatonuina ai le taitaifono aoao o le Ekalesia, o le isi lea o loo faasaga i ai le tagi, ma isi uma o loo tuua‘ia poo sui o le Komiti Faatonu ma le Komiti a Toeaina, mai le toe faia o se isi filifiliga o se Faifeau Toeaina o le Matagaluega a Kuiniselani.
Faaalia e Leulua‘ialii Olinda, o loo manino le vaega lea o le faaiuga, ua toe faaauau tofi Toeaina o Kerita, ae o le a faatali loa i le suesueina o lana talosaga faasaga i le aveesea o ona tofi ua afaina ai ana aiā tatau, aemaise o le aafia o le faimea tonu i le leai o se avanoa na tuuina i ai e tali atu ai i le faaiuga a le Komiti Faatonu e suesueina ai amioga a le au faigaluega (Faifeau), na latou aveesea ona tofi mulimuli ane tuuina atu i le Autoeaina ma faamausali ai le latou iuga.
O loo feteenai le faamatalaina ma le faauigaina o le iuga ua aumai ma se mau a loia o le itu tetee. Faaalia e se tusitala o le leitio a le 2AP le susuga Tutuila Farao, sa ia faasalalau le taunuuga o le faaiuga, ae na fesiligia e se tasi o loia mo le itu tetee ma avatu ai se faaseā faapea e sese, ma le faamatalaga atu, e lē o toe maua tofi o le susuga Kerita.
“Fai mai e fai atu se faasa‘oga, ae ou te lē iloa poo le ā le faasa‘oga, o lea e manino le faaiuga tusitusia na tufa mai i tusitala e le loia a le itu tagi”.
Faaalia e Leulua‘ialii Olinda, o le talia e le faamasinoga o le vaega autu o le talosaga a le faifeau o loo ia tauaveina, o le manumalo lea o le finau a Kerita. Peitai ua manino mai foi i le faaiuga, o lea ua manumalo le finauga a loia a le itu tetee i se tasi o vaega o le latou talosaga e taofi le tagi (strike out motion), e taofi le aafia o le ekalesia aoao (EFKS) i le tagi ona e lē o mafai i aiaiga o le Tulafono o galuega a le faamasinoga ona suesueina ni mataupu e aafia ai se fa’alapotopotoga faapei o se ekalesia (unincorporated organization).
O le teena o le vaega lea o le tagi autu na teuteu ai le talosaga a le faafeagaiga ma lana loia, ma suia i le faasaga o le mataupu i le taitaifono aoao le susuga i le Toeaina o Tautiaga Senara.
O le teena o le vaega lea o le tagi autu ua lē mafai ona finauina ai se mau a le itu tagi na faaalia e Leulua‘ialii Olinda, o le a tuuina atu se apili i le faamasinoga o talosaga apili.
Faaalia e le tamaitai loia o le a suesueina atili ai le la finauga, e tatau ona suesueina se ekalesia pe a tuua‘ia e le faamasinoga, i lona talitonuga o le ekalesia foi e tatau ona mautali i ni faaletonu e aafia ai i faaiugafai ae o loo faauluulu i ai.
