Ole taeao ole Aso Toonai, 26 o Novema na faia ai se sauniga tele ile malumalu ole ekalesia ole PIPC i Manukau e faapaia ai ma talia aloaia ai le Ekalesia fou ole Satauro ole Faaolataga e avea ma se tasi o aulotu ole Perepereane poo le PIPC i Niu Sila.
O lea foi sauniga na faaatoatoa ai ma tofiga faifeau ale susuga ia Leaia Pio ma lona faletua i lalo ole faamalu ale PIPC, e ala lea i ona tiute tauave i taiala faavae ole Ekalesia PIPC. Na maitauina le tumutumu ai o susuga i faafeagaiga ma o latou faletua, o aiga ma uo, faapea taitaifono ole Sinoti ale PIPC e molimauina lenei faamoemoe tāua.
Ole susuga ia Rev Karima Fai‘ai ole taitaifono ole Sinoti Tagata Atumotu na ia taitaiina le sauniga ae ole failautusi ia Rev Apa Leaaliifano sa vaavaalua ma Rev Karima Fai‘ai ile faagasoloina ole sauniga, ma o ia foi na fofogaina faamanuiaga na tuuina mai i Knox College, e tusa ai ma le faapaiaina aloaia o Rev Leaia Pio ma lona faletua faapea le talia ole Ekalesia Satauro ole Faaolataga e avea ma se tasi o aulotu ale PIPC.
E lē gata i lea ole faailoaina aloaia ole faaiuga ale Perepereane ua talia aloaia ai Rev Leaia Pio, ina ua iu ma le manuia ana aoaoga mai le tolu tausaga.
Ole upu folafola ale Atua na manavaina lea ele susuga ile faafeagaiga ia Rev Mafala Koko ole taitaifono ole Fono a Samoa, ae ole tatalo na fofogaina lea e Rev Ere Talagi-Ikitoelagi, ole faitauina ole Tusi Paia na fofogaina lea e Rev Toko Ine. Ole apoapoai ma le luitau ale susuga ia Rev Maafala Koko ile Ekalesia ma lana auauna, “ia faamalolosi ile galuega ale Atua. O ā faafitauli ma fita ole savaliga, ia aua ne‘i e faapea ai ua muta le finagalo ole Atua mo lana galuega, ae ia mau pea le toovae ma faamalolosi mo le Alii ma lona finagalo.”
Ile taimi lava lea ole sauniga na faapaia ai e susuga i faafeagaiga uma ole PIPC sa auai le susuga ile faafeagaiga ma le faletua, ma tauaaoina ai loa iai ma lona laei faapitoa ole ata ua faailoa ai le tatala o taiala uma ma faavae ole galuega ale PIPC e tauaveina e Rev Leaia Pio auā le tausiaina o lana lafu mamoe i Manurewa.
Na taualuga lenei mafutaga ile taumafataga lea sa fai ai le susuga ia Timuiaileala Mose ma fofoga ole aso ae ole aao tusitusi ole aulotu le tofa ia Fiso Leausa sa tu tootoo ile taimi o faaaloaloga.
Ile saunoaga a Rev Leaia Pio na ia faailoa ai, e valu tausaga talu ona faavae mai le lotu. I totonu o nei tausaga e valu, e lua tausaga sa galulue ai i lalo ole faamalu ole LMS Fuataina, ae ono tausaga sa see mai loa ma galulue i lalo ole PIPC ae e lei taliaina i lena taimi, ona sa iai aiaiga e tatau ona galulue muamua ai le faafeagaiga ma le Ekalesia ona faatoa talia aloaia ai loa lea e avea ma aulotu ale PIPC.
Ose fiafiaga ia i laua aemaise ole ekalesia ole Satauro ole Faaolataga ua tau lau ole faamoemoe sa asa mai ai le fita ole vao filifili, lea ua taunuu manuia le manaoga sa nofo tatalo ai aiga ma le ekalesia e pei ona faatinoina ile Aso Toonai ua mavae.
Ole ā foi le sousou ole folauga sa afatia ai le malaga ae iai lona talitonuga sa lē mafai ona tuulafoaina ele Atua lana fanau, ma e faafoi ai lava le viiga ile Atua.
