O le faatagiula mai a le EFKS Etena Fou mai Sagafili Mulifanua i le paia ma le mamalu o le afioaga o loo aumau ma papaaao i Sini nei mo se fesoasoani i le totogiina o le aitalafu a le Ekalesia, na vaaia ai le tumutumu o le Maluapapa Hall a le EFKS i Fairfield i le Aso Toonai mo la latou foi Tusigaigoa.
O le sauniga amata na feagai ma le Toeaina Faatonu Rev Peleti Toese Toailoa o le EFKS lava a Fairfield.
Na mae‘a lea tatala loa taualumaga o le aso i le Siva a le susuga i le Faafeagaiga Toeaina ia Rev Taipo Malifa o ia foi o le Toeaina Faatonu faaolioli.
Na sosoo ai ma le faagasologa o Siva a Ekalesia, tauaiga, sui valaaulia faapea le mafutaga seia oo i le taualuga a le Toeaina Faatonu Rev Peleti Toailoa.
O le aoao fesoasoani o le EFKS mai Samoa ia Tiumalumatua Papamaa Opa na saunoa e molimoli le faafetai i le maau ma le milomilosia o le aofia.
Na faaiu i le usuina o le ‘Lota Nuu’ ma sa faailoa ai loa le aofai o le seleni e $70,032,00.
O le Aso Lulu o le vaiaso lava ua tuanai na malaga atu ai le Taitaifono o le mafutaga i Sini afioga Papalii Taoai Vaioo Laumaopo Taoai, Failautusi ia Tupuola Viliamu Eli faapea le Teutupe ia Papalii Loli Iosefa Peleti Toailoa, faatasi ma sui o le mafutaga e molimoli lenei seleni atoa e totogi ai le aitalafu o le Falesa i Sagafili Mulifanua o loo galue ai le susuga ia Rev Simona Avaoi‘a ma le faletua.
