Mai le taimi na mae‘a ai le tauvaga ole Miss Samoa NZ ile tausaga 2006 lea sa tauva ai le tamaitai o Tala Moneca Sooalo-Page, o iina sa faamautu ma faamausali ai se manaoga i lona loto, a oo ina matua ma fai sana faaipoipoga, o ia e fia faaipoipo ise ofu e su‘i faafefiloi ile faa-Samoa ma le faa-Papalagi.
O lea tauvaga na laeiina ai e Tala Moneca se ofu na su‘iina ile siapo ile taimi o tauvaga laei, ma o iina na toe fafagu ma faamautu ai i lona loto se mea ua leva ona momoo iai mai lona laititi e fia faaipoipo ise ofu e su‘i faafefiloi.
Na oni moomooga faivavale sa tuputupu a‘e i lea taimi i lona laititi ae sa tatalo pea ile Atua poo afea e taunuu ai lea moemitiga.
O Tala Moneca Sooalo-Page o lona tina ole Samoa ia Iraisa Sooalo mai le afioaga o Samauga i Savaii ae o lona tamā ole alii papalagi, le susuga ia Raleigh Page.
E ui o lona tamā ole palagi, ae o lona loto atoa ma lona agaga atoa, e fiafia i tu ma aga faasamoa.
Tagi i lima le manaoga o lana tama
Ile molimau ale tina ia Iraisa Sooalo-Page, e lei faigofie ia te ia le manaoga a lana tama ina ua sauni lona aso fiafia, auā ose tamaitai e pele i lona loto, ona o lona lima taumatau lea i lona aiga i galuegafai i soo se mea. E usitai ma faalogo i sana tala e fai atu iai, ae ose tamaitai foi e osiaiga i lona itu samoa.
Ina ua talanoa atu si ana tama ia te ia i lana faaipoipoga, o iina na amata mai ai ona nofo ma mafaufau poo le ā se tapenaga lelei e ao ona ia faia e tali ai le manaoga o si ana tama.
Saunoa le tina, e tolu tausaga o tapenapena i lenei faamoemoe ae sa tagi lava i lima. Sa tele ina nofonofo ile fleamaketi e faatau ana pai i Aso Toonai ae o lana fanau e faatauina i luga ole facebook i fesooaiga televavave faaonaponei, e faatau foi ana ‘aiga i nisi o Aso Toonai i ana uo ma tagata o lona aiga.
O lona naunautaiga ia aua lava ne‘i mae‘a lenei faamoemoe ae toe safa mulimuli ane ini nonogatupe e totogi ile faletupe.
O loto o tina ia latou alo tamaitai ia fai lelei se faaipoipoga, ma e faapena foi le loto o lenei tina ia Iraisa ile taumafai e saili punouai le manaoga o lana tama ise ofu faaipoipo e su‘i faafefiloi ile faa-Samoa ma le faa-Papalagi.
Ole Aso Toonai, 15 o Oketopa na laeiina ai loa ele tamaitai ia Tala Moneca Sooalo-Page le ofu na ia momoo iai ile taimi o lana faaipoipoga. O lea osigafeagaiga ale faatoafaiava le alii o Gavin Francis Tapelu To‘oala ma le faatoanofotane le tamaitai ia Tala Moneca Sooalo-Page, na molimauina ai e aiga na lua, na malaga mai Ausetalia, Samoa ma Niu Sila nei, ae faapea foi i uo ma ē Masani, le matagofie ole tapenaga ole laei ole tamaitai faaipoipo lea sa su‘iina ile ie papalagi ma le ietoga, le measina a Samoa.
Ole susuga ile faafeagaiga ia Rev Ben Dykman na ia taitaiina lea sauniga mamalu ile malumalu ole Ekalesia Presbyterian i Greenlane. Na matuā faatumulia lea malumalu ile auvalaaulia ma aiga sa auai ile patipatia ole aso fiafia ole ulugalii fou.
Na faaauau le mafutaga i aiga ma le auvalaaulia faapea le aiga fou ile Manukau Events Centre ile taimi ole taumafataga.
Ole susuga ia Faanana Efeso Collin sa fai ma fofoga ole aso ma o ia foi sa faia faaaloaloga ile taimi mulimuli.
E tele faafiafiaga eseese na molimauina ele ulugalii fou na tapenaina e aiga, faapea ma musika mālie ale susuga ia Seumanu Francis Ioane sa DJ i lea aso.
Ole afiafi ole Aso Sa na momoli aloaia ai loa le ulumoega ole tamaitai faaipoipo ia Tala i lona aiga fou le alii o Gavin Francis Tapelu To‘oala ma lona aiga. Ma ole susuga ia Sooalo Kuresa na malaga mai Samoa, sa nafa ma le momoliina ole ulumoega ole tamaitai faaipoipo, ae ole tofa ia Seuamuli Sapio sa fai ma sui ole aiga ole alii faaipoipo e tali fuaitau ile tootoo ole aso.
O faamanuiaga ma alofaaga molipo mai aiga na lua faapea uo ma ē masani mai atunuu mamao ae sili ai faamanuiaga mai le tina peleina ia Iraisa Sooalo-Page mo le la aiga fou. Ia manuia le aiga fou!
O Gavin Francis To‘oala ose alo e faasino ile susuga ile alii loia ia To‘oala Tuipoloa To‘oto‘o To‘oala ma le faletua ia Alice To‘oala mai le afioaga o Faga ma Fagamalo i Savaii.
