Ole tele o fesili faasaga ile nonogatupe lima miliona tala ase kamupani Saina mai le faaputuga tupe ale NPF, na mafua ai ona faamanino ele Minisita o Tupe, Sili Epa Tuioti, aiaiga o nonogatupe oloo faamatuu atu ele NPF i tagata lautele ma le aufaipisinisi.
Na faaalia ele alii minisita ile nusipepa ale Samoa Observer, e tatau i kamupani mai fafo ona omai ma aumai tupe e faafoe ai a latou pisinisi.
O fesoasoani ale malo mo i latou e ala lea ile faapa‘ū o tau o tiute mo latou mo se taimi faatapulaa, ae lē ole faamoemoe e omai i Samoa e fai ai nonogatupe e faafoe ai latou pisinisi. Afai e le omai ma ni tupe e le tatau la ona ta‘ua latou oni tagata inivesi poo tagata oloo omai e faafaigaluega a latou tupe i totonu ole atunuu.
Na ta‘ua ele alii Minisita, afai e faafaigaluega tupe a tagata nei i totonu ole atunuu ma sologa lelei foi a latou pisinisi, ae iai se taimi e moomia ai se fesoasoani tau tupe ma ua iai foi le faatuatuaga ia latou pisinisi oloo fai, e matala lava le avanoa mo latou e fai ai ni nonogatupe mai le NPF poo faletupe i totonu ole atunuu.
Ole mataupu lenei na amata ona lagalaga ina ua faamatuu atu ele Malo le maketi i Vaitele ile alii fai pisinisi mai Saina e ana ia le kamupani ale Coin Save. Ole maketi i Vaitele, e leai se tupe ale Malo na maua mai ai na‘o tupe maimau. Ole fuafuaga ale malo e faamatuu atu le Maketi ile alii faipisinisi mai Saina, ole a maua mai ai se tupe mamā, nai lo le taimi nei e leai ma se tupe o maua mai le Maketi.
Ole mae‘a ona faamautu o lea fuafuaga ele Malo, na talosagaina ai ele alii Saina se nonogatupe e lima miliona tala mai le NPF, na talia ele NPF. Na saunoa le alii minisita, e le tatau foi ona faapito le tatou vaai ile faamatuu atu ele NPF ole loan ile kamupani Saina, auā o loan oloo faamatuu atu, oloo maua mai ai tupe faasili e ala i tupe tului, lea e tusa ma le 30 miliona tala ile tausaga.
O tupe nei oloo vavae ai se vaega tupe oloo faasoa atu ile au faisaofaga ale NPF. O faaiuga uma lava e fai ele NPF i nonogatupe oloo faamatuu atu, e fai lava ma le faaeteete, ma iloilo toto‘a foi ina ia mautinoa e maua mai ai ni tupe faasili e faasafua atu ile au faisaofaga e iai oe ma a‘u.
Na ta‘ua foi ele Minisita, o nonogatupe foi oloo faamatuu atu ele NPF, oloo iai lava aiaiga ua mae‘a ona faataoto, e ao foi ona mautinoa e iai ni aseta poo meatotino ale pisinisi ua faamatuu atu iai se nonoga tupe, e mafai ona aapa iai le NPF, peafai ua le mafai ona toe totogi mai le aitalafu.
E le fou ile NPF le faamatuu atu o tupe i kamupani mai fafo oloo faafaigaluega a latou tupe i totonu ole atunuu. Sa faamatuu atu ele NPF se nonoga tupe ile Aggies Resort i Mulifanua, faapea foi le Taumeasina Resort.
O nei nonogatupe na faamatuu atu ma le talitonuga ole atinaeina o turisi, e tele manuia e maua mai ai, e le gata i galuega fou ae o avanoa mo nisi foi atinae o pisinisi fou. Ole vaai foi lea ale Malo ile taimi nei, e vaai mamao mo le manuia o tagata uma.
